Simptomat pas marrjes së drogës për përdhunim: trullos dhe shuan kujtesën

Si të njohësh efektin e një droge të rrezikshme dhe si të mbrohesh

Si “drogë përdhunimi” përdoret më shpesh ilaçi “Rohypnol”, që prodhohet kundër pagjumësisë. Shkakton përgjumje dhe dobësim muskujsh, dhe pas kësaj viktimës nuk i kujtohen shumë ngjarje.

Drogë përdhunimi është termi i përdorur shpesh për një ilaç të quajtur flunitrazepam, me të cilin abuzimi filloi në vitet ’80 të shekullit të kaluar.

Ajo aplikohet në shërimin e pagjumësisë dhe është e njohur edhe me emrin e prodhuesit “Rohypnol”, ndërsa përdhunuesit e përdorin për trullosje të viktimave, transmeton Telegrafi.

Një tabletë e kësaj droge e hedhur në një pije as që mund të njihej fillimisht. Tretej lehtë, ishte pa ngjyrë, pa shije dhe pa erë. Për shkak të rasteve të shumta të abuzimit, është riformuluar në tabletë me ngjyrë të gjelbër ulliri, me numrin e shtypur qartë 542.

Kur hidhet në pije, kjo tabletë e re tretet ngadalë, por shpejt lëngut i jep ngjyrën e kaltër. Pra, mund të shihet në gotë.

Ja cilat vështirësi i ndiejnë personat të cilët e pinë flunitrazepam:

Së pari shfaqen përgjumje, lodhje, dhimbje koke dhe marramendje. Një person gjithashtu përjeton një rënie të presionit të gjakut, halucinacione dhe të përziera. Ilaçet e përdhunimit fillojnë të veprojnë 20 deri në 30 minuta pas marrjes.

Kushdo që ndjen këto simptoma duhet të largohet nga skena sa më shpejt të jetë e mundur, me ndihmën e njerëzve të cilëve u besojnë. Efekti i plotë i flunitrazepam ndodh brenda dy orësh dhe mund të zgjasë nga 8 deri në 12 orë.

Një person i pambrojtur ndjen dobësi të muskujve, shpërqendrohet, flet në mënyrë të paqartë, ka koordinim shumë të dobët të lëvizjeve. Shfaqet amnezi anterograde, që do të thotë se një person nuk do të kujtojë veprimet dhe ngjarjet pas marrjes së këtij ilaçi.

Në rast mbidozimi, është e mundur që frymëmarrja të dëmtohet, si dhe dështimi i veshkave ose mëlçisë dhe personi i droguar mund të bjerë në koma. Është i nevojshëm kujdesi i menjëhershëm mjekësor, si dhe dhënia e barnave të përshtatshme.

Gjurmët e Rohypnol mund të zbulohen në urinë pesë deri në 14 ditë pas gëlltitjes.

Mbrojtja më e mirë është kujdesi kur qëndroni në shoqërinë e të huajve ku shërbehen pije. Nuk duhet të pranoni pije nga të tjerët, duhet të porosisni gjithmonë atë të mbyllur në një kënaçe ose shishe dhe një gotë pije që ka mbetur pa mbikëqyrje në tryezën tuaj nuk duhet të përdoret përsëri. /Telegrafi/