Vetëvendosje e quan akt tradhtie zëvendësimin e paraburgimit me arrest shtëpiak për Pantiqin

Ish- policit serb, Dejan Pantiq me kërkesë të Prokurorisë Speciale me vendim të Gjykatës Themelore në Prishtinë, i është ndryshuar masa e sigurisë nga paraburgimi në arrest shtëpiak.

Një vendim i tillë ka nxitur reagimin e partisë e cila është në pushtet, Lëvizjes Vetëvendosje.

Zëdhënësi i LVV-së, Arlind Manxhuka e ka konsideruar akt tradhtie ndryshimin e masës së paraburgimit ndaj Pantiqit.

“Ky aktlirim është akttradhëti”, ka shkruar Manxhuka në Facebook.

Edhe deputeti i kësaj partie, Dimal Basha ka reaguar duke thënë se ka mbetur pa fjalë nga ky vendim.

“Dejan Pantiqi akuzohet për vepër terroriste, kurse gjyqtari Mentor Bajraktari ia zëvendëson masën e paraburgimit me arrest shtëpiak. A m’tregon kush se si një gjyqtar normal arrinë me vlerësu se terroristi qenka më sigurt n’shpi se n’burg? Po me pas qenë n’Serbi i kish shqiptu masë ma t’randë se ky n’Kosovë. Nuk ka vetting që ta hjek tutën, po as që ta shton dozën e patriotizmit! Pa fjalë!!!”, ka shkruar Basha në Facebook.

Edhe deputeti Haki Abazi, ka thënë se një vendim i tillë është dështim i gjithë zingjirit institucional.

“Ka rëndësi veprimi jo deklarimi dhe frazat.  Reformimi i qeverisë dhe reformimi i gjyqësorit është imperativ urgjent dhe prioritet. Lëshimi i Pantiq në arrest shtëpiak është dështim i gjithë zingjirit institucional. Nuk bëhet shteti me njerëz që kanë privatizuar e kanë kriminalizuar sektorët vital në të kaluarën.  Ne kemi marrë besimin për ndryshim dhe jo tolerim të avazit të vjetër.  Sa bëni luftë e linçim të atyre që nuk mendojnë njëjtë dhe angazhoni luftë speciale kundër atyre që nuk mendojnë sikur Mihaili  do të duhej të sqaroni pse keni adaptuar metodat e njëjta sikur këta që ishin në qeverisje të vendit deri para dy viteve”, ka shkruar Abazi.

Për ndryshimin e masës së sigurisë ndaj Pantiqit është shprehur i habitur edhe vetë kryeministri Albin Kurti.

Kurti ka theksuar se është kureshtar ta marrë vesh se cili është ai prokuror që e ka bërë kërkesën për lirim dhe ai gjykatës paraprak që e ka marrë këtë vendim.

Pantiq ishte arrestuar nën dyshimin për sulme ndaj Policisë së Kosovës dhe Komisioneve Komunale Zgjedhore në veri. /Telegrafi/