Ziberi: Duhej të prisnim sinjale nga ambasada amerikane për të kuptuar se gjendja në gjyqësorë nuk është e mirë

Avokati i Popullit Naser Ziberi personalisht dyshon se ka vullnet, kapacitet dhe burime të mjaftueshme në institucionet kompetente për të ndryshuar situatën me besimin e ulët të qytetarëve në gjyqësor.

Ziberi, duke komentuar anketën e IRI-së për rënien e besimit të qytetarëve në gjyqësor, në konferencën e sotme për media, ka sqaruar se këtu para së gjithash e ka fjalën për Këshillin Gjyqësor Republikan dhe Këshillin e Prokurorëve Publikë.

“Pa ndonjë rol më aktiv të të gjitha segmenteve të qeverisë. E kam fjalën për Qeverinë, Kuvendin, Gjyqësorin, nuk ka gjasa të ketë ndonjë përmirësim më serioz. Duhet të prisnim të na sinjalizonin dhe të na kritikonin Ambasada Amerikane, BE etj., për të na bërë të vetëdijshëm se gjendja nuk është e mirë”, tha Ziberi.

Lidhur me mbrojtjen e të drejtave të njeriut në fushën e drejtësisë, Ziberi theksoi se numri më i madh i parashtresave në institucionin e Avokatit të Popullit vijnë nga kjo fushë, pra gjyqësori, gjykatat themelore, përmbaruesit, avokatët, noterët./Telegrafi/