Pavarësisht luftimeve, ukrainasit dekorojnë bredhin në stacionin e metrosë në Kiev – për ndezjen e dritave përdorën metodë interesante

Pavarësisht luftimeve të ashpra dhe problemeve të shumta me energji elektrike, ngrohje e ujë të pijshëm, ukrainasit nuk i ndali asgjë që të dekorojnë bredhin në prag të festës së Krishtlindjes.

Megjithatë për t’i ndezur dritat e bredhit të vendosur në stacionin e metrosë në Kiev, inxhinierët prodhuan një pajisje që me sjelljen e pedaleve të biçikletës prodhon rrymë të mjaftueshme sa për t’i ndezur dritat në bredh, transmeton Telegrafi.

Me këtë veprim ata po tentojnë të ngritin moralin dhe të sjellin shpirtin festiv në kryeqytetin ukrainas, i cili nga 24 shkurti ishte cak i vazhdueshëm i ushtrisë ruse.

Anton Gerashchenko, këshilltar i Ministrit të Punëve të Brendshme të Ukrainës, ka shpërndarë pamjet e bredhit që u ndriçua në momentin që një burrë filloi të lëvizë pedalet e biçikletës.

Bredhi është stolisur në stacionin e metrosë së Kievit, dhe disa tjerë janë vendosur nëpër qytete tjera ku po vazhdojnë të zhvillohen luftime të ashpra. /Telegrafi/

In Kyiv, a Christmas tree has been installed at the railway station, which will be illuminated by an exercise bike.

A creative way to save electricity: if you want to light up the tree, pedal. pic.twitter.com/QL8nrPZRrc

— Anton Gerashchenko (@Gerashchenko_en) December 18, 2022