Rama: Projekti përfundimtar i Portit të Durrësit prezantohet më 12 dhjetor, ndërtimi do të filloj në gjashtëmujorin e dytë të 2023-së

Kryeministri i Shqipërisë, Edi Rama ka thënë se projekti përfundimtar i Portit të Durrësit do të prezantohet më 12 dhjetor.

Rama duke folur në mbledhjen e dy kuvendeve Shqipëri-Kosovë për nder të 110 vjetorit të pavarësisë, është shprehur se ndërtimi i tij do të filloj në gjashtëmujorin e dytë të 2023-së.

“Për hekurudhën Durrës-Prishtinë themi tanimë se ofertuesit, një grup i gjerë, kompanish tani të mëdha të Evropës që kanë marr përsipër studimin e fizibilitetit porositur nga qeveritë me vendim të përbashkët”, tha Rama, përcjell Telegrafi.

Ai shton se në fillim të vitit të ardhshëm do të hapet gara ndërkombëtare për Portin e ri të Durrësit.

“Ndërkohë, pavarësisht të gjitha llafeve, në fillim të vitit të ardhshëm ne hapim garën ndërkombëtare për Portin e ri të Durrësit, i cili do të ndërtohet në Porto Romano dhe nëse gjithçka do të shkoj sipas planit, në fillim të gjashtëmujorit të dytë të vitit të ardhshëm ne do të jemi në kantier në portin e ri të Porto Romanos, e që do të jetë i përbashkët, i shtrirë nga Durrësi në Prishtinë dhe në Strugë”, shtoi ai.

“Për hekurudhën Durrës-Prishtinë tani hynë na fazën e studimit të fizibilitetit. Për hekurudhën tjetër jemi në diskutime me Bashkimin Evropian”, theksoi Rama.

Sipas tij, më 12 dhjetor do të bëhet prezantimi i projektit përfundimtar.

“Më 12 dhjetor, unë shpresoj që kryeministri i Kosovës dhe ministrat e fushave të na bashkohen në prezantimin e madh publik të projektit përfundimtar, pasi kemi shtruar publikisht konceptin për portin e ri, ku me këtë datë do ta prezantojmë projektin përfundimtar, i cili do t’i nënshtrohet garës në fillim të vitit të ardhshëm dhe do të filloj nga punë në fillim të gjashtëmujorit të dytë 2023”, përfundoi ai. /Telegrafi/