Sokoli, Tovërlani dhe Munishi flasin për humbjen e Gjermanisë ndaj Japonisë, tregojnë se si erdhi kjo

Emisioni “Dueli Botëror” në RTV Dukagjini, ka vazhduar edhe sot ku të pranishëm ishin Bylbyl Sokoli, Ismet Munishi dhe Afrim Tovërlani, tre trajner të njohur të futbollit tonë.

Treshja e njohur do të jenë analistët e Kampionatit Botëror Katar 2022 në RTV Dukagjini, ndërsa sot kanë folur për humbjen e Gjermanisë ndaj Japonisë.

Sokoli e cilësoi si ‘Grupin e vdekjes’, atë ku gjenden Spanja, Gjermania, Japonia dhe Kosta Rika.

“Grupi i Gjermanisë do të jetë më i vështiri në vazhdim. Pres me padurim duelin ndërmjet Spanjës dhe Gjermanisë. Unë mendoj që ky grup do jetë tejet interesant”, deklaroi Sokoli.

Në anën tjetër trajneri i njohur, Afrim Tovërlani ka diskutuar rreth “fuqisë” që ka Gjermania.

“Nuk është një Gjermani që e kemi pa shumë në të kaluarën. Nuk është skuadër e fortë sikur në vitin 2024. Japonia e meritoi fitoren”, deklaroi ai.

Edhe Ismet Munishi ka thënë që Gjermania e ka humbur bazamentin.

“Kam respekt për trajnerin e Gjermanisë, por e kanë humbur bazamentin. Japonia është skuadër e papërshtatshme”, deklaroi ai.

Kjo është vetëm nata e pestë e emisionit “Dueli Botëror” i cili do zgjasë deri në finalen e madhe të Kupës së Botës.

Edhe në netët në vazhdim do të ketë të ftuar të ndryshëm nga bota e sportit dhe jo vetëm, të cilët në fokus kryesor do ta kenë diskutimin për Kampionatin Botëror. /RTV Dukagjini/