Ishte thënë se Putini është ‘konfrontuar privatisht’ me një aleat kyç rreth luftës në Ukrainë – tani zbulohet identiteti i tij

Mediat e huaja kanë raportuar në lidhje me raportet se Vladimir Putin ishte ‘konfrontuar privatisht’ me një aleat kyç në lidhje me trajtimin e luftës në Ukrainë nga ushtria e tij.

Dhe sipas Sky News, përcjell Telegrafi, tanimë është zbuluar identiteti i atij aleati, i cili me sa duket është zbuluar si Yevgeniy Prigozhin, themeluesi i grupit mercenar Wagner.

Sipas Washington Post, e cila citon zyrtarë amerikanë, Prigozhin sfidoi personalisht presidentin rus me zhgënjimet e tij për keqmenaxhimin e përpjekjeve të luftës.

Siç vë në dukje gazeta, gatishmëria e tij për t’i bërë të njohura drejtpërdrejt pikëpamjet e tij Putinit “tregon sesi ndikimi i tij po rritet ndërsa lufta e Moskës nuk po shkon sipas planeve”.

Ai thuhet se ka qenë ndër kritikët më të shquar të ministrisë ruse të mbrojtjes, ndërsa kërkon përshkallëzimin e konfliktit nga Moska.

Dhe një numër analistësh kanë sugjeruar se ai është një figurë kyçe në luftën për pushtet që po zhvillohet rreth Kremlinit pasi pushtimi rus i Ukrainës është përballur me një sërë pengesash poshtëruese.

Megjithatë, mbetet e paqartë nëse Prigozhin thjesht po kërkon të rrisë ndikimin e tij në ushtrinë ruse apo nëse ai ka ambicie më të rëndësishme politike.

“Ai ka qenë me të vërtetë në rritje gjatë gjithë këtyre muajve të fundit”, ka thënë Marlene Laruelle, drejtore e Institutit për Studime Evropiane, Rusi dhe Euroaziatike në Universitetin George Washington.

“Lufta i dha atij mundësinë për të pasur qasje te Putin më shumë se kurrë më parë”.

Ndërsa Fiona Hill, një ish-zyrtare e lartë e Shtëpisë së Bardhë që merret me çështjet ruse dhe euroaziatike, tha: “Njerëz si Prigozhin tani shohin një shans. Kjo vërtet tregon se sistemi është nën stres, kur njerëzit fillojnë ta shtyjnë veten përpara”. /Telegrafi/