Maqedonia do të sigurojë energji elektrike për 5.500 amvisëri nga centrali i ri diellor në Amzabegovë

Për 5.500 amvisëri do të sigurohet energji elektrike nga centrali diellor me kapacitet prej 17 megavatësh i locuar në Amzabegovë të Sveti Nikollës, investim i Grupacionit GENI. Ndërtimi i kapacitetit filloi vitin e kaluar, ndërsa 17-të megavatë energji diellore tashmë janë duke u shpërndarë nëpër rrjet, i cili është vënë në funksion tre muaj para afatit të paraparë.

Igor Koprivarnik, kryetar i Këshillit Drejtues të GENI-it, në konferencën për shtyp me rastin e fillimit me punë potencoi se kapaciteti i ri është centrali më i madh solar që është ndërtuar në shtet dhe se është kthesë kryesore në punën e tyre, por edhe në transformimin e gjelbër të rajonit dhe Maqedonisë së Veriut.

“Qeveria i njohu investimet në fotovoltaikët solarë si hap kyç në përmbushjen e qëllimeve për qëndrueshmëri. Kriza me energjensat i preku të gjithë, çmimi i energjisë elektrike është në rritje, në fund të gushtit e arriti kulmin prej 1000 eurosh për një megavat orë, për çka prodhimi solar i energjisë elektrike ka rëndësi akoma më të madhe, çdo megavat orë është e rëndësishme”, tha Koprivarnik.

Sipas kryeministrit, Dimitar Kovaçevski, investimi është një hap i madh për realizimin e ambicieve qeveritare për sigurimin e energjisë elektrike prej burimeve të rinovueshme të energjisë.

“Sot nuk jemi duke folur për të kaluarën por për të ardhmen. Jemi duke folur për projekte të reja që duhet të na sjellin stabilitet në furnizimin me energji elektrike. Investimi më i madh në centralin fotovoltaik tregon se si punon një Qeveri e përgjegjshme, si mund të funksionojnë institucionet në nivel shtetëror dhe lokal dhe si ka rezultat në të gjithë këtë që vjen tre muaj para afatit të dhënë”, tha Kovaçevski.

GENI i fitoi 17 nga 35 megavatët që ishin ofruar në tenderin e Ministrisë së Ekonomisë. Siç potencoi ministri resor Kreshnik Bekteshi, me këtë investim janë fituar 17 megavatë shtesë, siç është bërë në 30 vitet e kaluara në shtet.

“Në afat prej 2,5 vitesh do të kemi fuqi instaluese prej mbi 220 megavatë, ndërsa janë duke u përgatitur edhe thirrje të reja dhe shpresoj se mandatin do ta përmbyllim me mbi 30 megavatë vetëm nga fotovoltaikët”, paralajmëroi Bekteshi.