Me Finlandën si një anëtare të re, NATO mund të ketë armë bërthamore “më afër Kremlinit”

Finlanda mund të bëhet “shtëpia e armëve bërthamore të NATO-s” dhe me një veprim të tillë ato do të “afroheshin” për vetëm 1000 kilometra nga Moska.

Kjo pasi presidenti finlandez Sauli Niinisto tha se nuk kishte “nuk kishte parakushte” për pranimin e vendit në organizmin ndërkombëtar, megjithëse zyrtarë të tjerë kanë thënë për Newsweek se lëvizja nuk ka gjasa të ndodhë aktualisht, përcjell Telegrafi.

Një deklarim i tillë vjen në kohën kur kishte spekulime se Finlanda do të hezitonte “të presë” armë bërthamore ose trupa të përhershme në tokën e saj dhe se mund të kërkojë garanci se nuk do të ishte kështu.

Kryeministrja Sanna Marin tha në fillim të këtij viti se NATO nuk kishte asnjë interes për bazat apo vendosjet bërthamore.

Por në një forum të Helsinkit të kësaj fundjave në kryeqytetin finlandez, presidenti Niinisto ka thënë: “Finlanda po kërkon të bëhet një anëtare e NATO-s, e plotë. Asgjë më shumë, asgjë më pak”.

“Ne nuk kemi ndonjë kërkesë apo rezervë të veçantë që do t’i vendosnim si parakushte për anëtarësimin tonë”.

Kjo deklaratë, vlerëson Newsweek, përcjell Telegrafi, në teori, e bën Finlandën “të hapur për të pritur armë bërthamore të NATO-s”, me kufirin jugor të vendit që ndodhet më pak se 1000 kilometra larg Moskës.

Ndryshe, Finlanda dhe Suedia kanë vendosur të bëhen anëtarët e 31-të dhe të 32-të të NATO-s, në pritje të ratifikimit nga parlamentet hungareze dhe turke, gjë që zyrtarët besojnë se do të ndodhë në muajt e ardhshëm.

Vendimi i përbashkët për t’u bashkuar me aleancën transatlantike i jep fund një politike dekadash të neutralitetit ushtarak në Helsinki dhe Stokholm; një dështim historik strategjik për presidentin Vladimir Putin që rrjedh nga pushtimi i vazhdueshëm i Ukrainës.

Aderimi i afërt i dyfishtë do të transformojë situatën gjeostrategjike në Evropën veriore dhe Deti Baltik do të bëhet i tillë që disa vëzhgues e kanë quajtur “një liqen i NATO-s”, ndërsa kufiri 1300 kilometra i gjatë Finlandë-Rusi do të bëhet vija e re e frontit të NATO-s me Moskën. /Telegrafi/