Të hënën dhe të martën, Britania do të bëhet më e nxehtë se shumë pjesë të shkretëtirës së Saharasë

Britania e Madhe “do të zhytet” në nxehtësi prej 31 gradë Celsius sot – përpara se temperaturat ekstreme të shpërthejnë të hënën dhe të martën.

Sipas mediave britanike, përcjell Telegrafi, një paralajmërim për motin e nxehtë është tashmë në fuqi për pothuajse të gjithë Anglinë, nga bregu jugor deri në Hartlepool dhe në të gjithë Uellsin lindor.

Kjo është përpara se një paralajmërim i kuq – që do të thotë se ka një rrezik për jetën – të hyjë në fuqi për dy ditë nga nesër, kur temperaturat e paprecedentë prej më shumë se 40°C mund të shihen në Anglinë qendrore.

Madje, sipas mediumit britanik Metro, kjo është më e nxehtë se sa do të jenë shumë pjesë të shkretëtirës së Saharasë.

Siç vë në pah mediumi në fjalë, “Met Office” ka parashikuar mot të thatë dhe të nxehtë në Uells, Midlands, Anglinë Juglindore dhe jugperëndimore përpara të nxehtit rekord.

Ndërkohë, Anglia Veriperëndimore dhe verilindore dhe Skocia parashikohet të kenë një ditë me vranësira, me reshje shiu.

Temperaturat maksimale prej 25°C parashikohen në veriperëndim të Anglisë, ndërsa verilindja dhe pjesa më e madhe e Skocisë mund të shohin temperaturat maksimale prej 23°C.

Ministri i Zyrës së Kabinetit, Kit Malthouse, paralajmëroi se shërbimet e transportit do të përballen me ‘ndërprerje të konsiderueshme’ javën e ardhshme për shkak të valës së të nxehtit dhe u bëri thirrje njerëzve të mos udhëtojnë.

Ai kryesoi një takim urgjent të Cobra të shtunën pasi meteorologët paralajmëruan se mijëra jetë mund të jenë në rrezik.

Rreth 2,500 njerëz besohet se kanë vdekur si pasojë e valëve të të nxehtit në vitin 2020, sipas ekspertëve.

Ndërkohë shërbimet publike gjithashtu pritet të ndikohen keq.

Z. Malthouse i tha BBC-së: “Natyrisht që ofruesit e transportit po u dërgojnë mesazh njerëzve se duhet të udhëtojnë vetëm nëse vërtet kanë nevojë të hënën dhe të martën”.

“Shërbimet do të preken ndjeshëm. Nxehtësia do të prekë shinat, për shembull, kështu që trenat duhet të ecin më ngadalë. Mund të ketë më pak shërbime. Njerëzit duhet të jenë vigjilentë”. /Telegrafi/