Rama flet sërish për kontratën me “Sunny Hill”: Nuk e kemi dhënë tokën për 99 vjet

Kryetari i Komunës së Prishtinës, Përparim Rama, i është kthyer sërish çështjes së festivalit “Sunny Hill”.

Ai ditën e djeshme (e hënë) ka qenë i ftuar në emisionin “Kallxo Përnime”, në një përballje me ministrin e Administrimit të Pushtetit Lokal (MAPL), Elbert Krasniqi.

Rama e ka sqaruar se me sa vite të drejtë shfrytëzimi kishte negociuar me “The Sunny Hill” SH.P.K për tokën në Bërnicë të Poshtme.

I njëjti deklaroi se sipas draft-kontratës, festivali do ta shfrytëzonte pronën prej 17 hektarësh deri në 99 vjet, dhe jo gjithsesi për kaq vite.

Lexo po ashtu Rama: “Sunny Hill” i takon Kosovës, kam besimin e plotë se nga viti tjetër do të rikthehet në shtëpinë e vetë

Pasi sipas tij, pas 25 vitesh vendoset nëse do t’i zgjatet festivalit edhe 25 vite të tjera, për të cilën ka theksuar se janë disa kushte.

“Draft-kontrata thotë aty që “Sunny Hill” raporton çdo 6 muaj në Kuvend, çdo vit duhet me ndodhë festivali i nivelit të Dua Lipës, nëse tri vite me radhë nuk ndodh atëherë toka i kthehet Komunës. Pika tjetër thotë se në vitin 25, nëse çdo gjë është mirë, i konvenon dy palëve prapë Komuna mundet me vendos që t’ia kthej tokën vetes nëse mendon që nuk po përdoret për të mirën e kryeqytetit apo ka një plan program për investime tjera, duke i dhënë pesë vite festivalit që të gjejë një vend tjetër. Pra teknikisht 30 vite. Në 25 vite vendos, që jemi në rregull, atëherë shkon +25, +25 deri në maksimum 99 vite. 99-vitëshi është një element, nëse krejt Kosova e ka harru atë tokë, i kthehet automatikisht. Nuk është vetëm në 99 vite edhe është kryer puna”, tha kryetari.

Më tej deklaroi se e ka ulur nga 22 hektarë në 17 hektarë që t’i jepen “The Sunny Hill ” SH.P.K.

“Atë 99 nuk e kam sjell unë, e kam gjetur. Kam bërë më të mirë më të mirën për kryeqytetin”, tha ai. “Unë nuk e shoh si problematike çështjen e 60-ditëshit të kalendarit, është e mjaftueshme”.

“Sunny Hill” javë më parë u anulua në Prishtinë dhe u zhvendos në Tiranë, teksa ditë më vonë u bë e ditur se do të mbahet në të dy vendet. /Telegrafi/