Ministria e Arsimit ndau bursa për studime për të rinjtë e komuniteteve në Kosovë

Ministria e Arsimit në bashkëpunimin me Ministrinë e Administrimit të Pushtetit Lokal (MAPL), kanë ndarë 100 bursa për të rinjtë e komunitetit RAE (rom, ashkali dhe egjiptian) për studime në Fakultetin e Edukimit.

Kështu bëri të ditur sot kryeministri i vendit, Albin Kurti gjatë një bashkëbisedimi me përfaqësuesit e komunitetit egjiptian të martën në objektin e Qeverisë së Kosovës.

Kurti tregoi po ashtu se Ministria e Arsimit ka ndarë edhe 500 bursa për rinjtë e këtij komuniteti edhe në drejtime të tjera të studimeve.

“Do të ketë edhe nisma të mira për punësim. Puna e mirë e ministrit Elbert Krasniqi, në bashkëpunim me ministren e Arsimit, Arbëri Nagavci për 100 bursa të komunitet rom, ashkali, egjiptian për studime në fakultet të Edukimit, në mënyrë që në të ardhmen e afërt në klasat tona të mund të kemi mësues dhe mësuese të komunitetit, ashtu që të kapin kontributin e tyre jo vetëm për fëmijët egjiptian por edhe për tërë fëmijët në vend. Po ashtu Ministria e Arsimit ka ndarë edhe 500 bursa për studentë të komiteteve rom, ashkali, egjiptian në drejtime të tjera të studimeve”, ka thënë Kurti.

Kurti tha se punësimi i këtyre komuniteteve jo shumicë është prioritet i ekzekutivit.

“Ne kemi vendosur një sistem transparent dhe fer për ndarjen e fondeve për komunitete dhe uroj që të kemi shumë iniciativa të qëlluara nga komuniteti egjiptian, ku do të mund të promovohen dhe mbrohen të drejtat e komunitetit. Zyra për çështje të drejtave të komuniteteve gjithsej ka 1 milion e gjysmë fonde për komunitete dhe më vjen mirë që gjatë verës do të hapet një thirrje tjetër për aftësimin dhe punësimin e pjesëtarëve të komuniteteve, pasi ky është prioritet si për qeverinë tonë, ashtu edhe për komunitetet. Ne kemi miratuar vendimin për krijimin e ekipit ndër-institucional për punësimin e komuniteteve, rom ashkali dhe egjiptian”, tha Kurti.

Kryeministri tha se kanë vendosur edhe një sistem transparent për ndarjen e fondeve për komunitetet jo shumicë.

“Gjatë vitit do të kemi një konferencë ku do të ndajmë storjet e tyre të suksesit për të inkurajuar të tjerë prej komuniteteve të kontribuojnë në aftësitë e tyre në institucione. Por edhe institucionet të kuptojnë se sa shumë po përfitojnë të gjithë nga diversiteti në vendet e punës. Edhe në nivel të komunave e dimë rëndësinë e përfaqësinë të komuniteteve”, shtoi ai. /Telegrafi/