Shenjat paralajmëruese më të zakonshme që partneri po ju tradhton

Ali Marsh ka zbuluar bashkëshortë të shumtë mashtrues brenda katër vitesh, për sa kohë ajo punon si hetuese private. Së fundmi ka folur për karrierën e saj dhe mënyrat se si mund të dalloni nëse partneri juaj ka një lidhje.

“Një nga rastet e mia më të hershme ishte një burrë që vuri re se gruaja e tij filloi të sillej më e ftohtë ndaj tij” – thotë ajo – duke shtuar se ai i tha asaj se “ajo dilte çdo të mërkurë mbrëma dhe vinte në shtëpi shumë më e lumtur se sa kur dilte, kështu që ai dyshoi se po e tradhtonte”.

Hetuesja tregon se e kishte vënë re shumë shpejt se fqinji i tyre po dilte dhe po largohej njëkohësisht me gruan e klientit të saj, ndaj i ndoqi dhe zbuloi se ata ishin në një lidhje.

Sipas saj, tradhtinë zakonisht e zbulon shumë shpejt, ndërsa më së shumti kohë për një detyrë të tillë i ka zgjatur tri javë.

Lexo po ashtu Zëri zbulon tradhtinë

Ajo thotë se së fundmi ka ndihmuar një grua të konfirmojë se burri i saj ka një lidhje dhe se ka bërë një zbulim tjetër tronditës për të.

Marsh shpjegon: “Ka rezultuar se ai kishte disa skandale, por gjatë hetimeve zbulova gjithashtu se kishte themeluar fshehurazi një kompani, e cila më pas hyri në pronë të përbashkët gjatë ndarjes së pasurisë pas divorcit”.

“Unë ndihmoj gjithashtu në gjetjen e të zhdukurve dhe jam 98 për qind e suksesshme, gjë për të cilën jam shumë krenare. Një herë gjeta babanë e humbur të një djali të vogël, që ishte një rezultat i mirë, dhe gjithashtu ndihmova një baba nga Shtetet e Bashkuara të gjejë vajzën e tij”, tregon tutje.

Duke u bazuar në përvojën e saj, ajo tregoi se cilat janë katër shenjat paralajmëruese më të zakonshme që partneri po ju tradhton:

Lexo po ashtu Si mund ta vëreni nëse e dashura është duke iu tradhtuar?

– Ndryshime në pamje dhe gardërobë – mund të jetë shenjë se ka takuar dikë tjetër, sepse kur kjo ndodh, njerëzit shpesh ndihen sikur janë në një fillim të ri dhe investojnë më shumë në vetvete.

– Ndryshim i rutinës – nëse partneri juaj rri papritmas vonë në punë, gjë që nuk ka ndodhur më parë, ose del në ditët kur ka qenë në shtëpi në të kaluarën, kjo mund të jetë edhe një shenjë e tradhtisë.

– Papritur kalon periudhë të gjatë kohore në palestër – nëse partneri juaj ka qenë zakonisht në divan që nga fillimi i lidhjes suaj, dhe tani befas viziton rregullisht palestrën, ndoshta është koha të kontrolloni se për çfarë palestre bëhet fjalë.

– Pranimi i telefonatave dhe largimi nga dhoma kur përgjigjet – kjo mund të jetë diçka e dukshme, të cilën të gjithë e kemi parë në filma, por gjithsesi vlen të përmendet. /Telegrafi/