Mitsotakis: Ballkani Perëndimor duhet të integrohet brenda vitit 2033 në BE

Kryeministri grek, Kyriakos Mitsotakis ka dhënë një intervistë për revistën politico, ku ka fol për marrëdhëniet midis Bashkimit Evropian dhe Ballkanit Perëndimor, duke thënë se është koha e fundit që procesi i zgjerimit të BE-së të rikthehej në rrugën e duhur.

Gjatë analizës së situatës në Ballkanin Perëndimor, të cilën e bëri si pjesë e samitit të Procesit të Bashkëpunimit të Evropës Juglindore në Selanik, Mitsotakis theksoi se është koha e fundit që Bashkimi Evropian të njohë rëndësinë jetike të integrimit të rajonit në familjen evropiane.

“Pas rënies së BRSS, besimi mbizotërues në Perëndim ishte se beteja për vlerat dhe idealet kishin mbaruar. Historia e Evropës, e përcaktuar nga konfliktet e dhunshme dhe dy luftërat botërore, konsiderohej se po shkonte drejt paqes, prosperitetit, bashkëpunimit dhe shteteve të së drejtës. Kjo i ka zbuluar në mënyrë të pamëshirshme Ukrainës sa të gabuara ishin idetë e tilla”, shkroi kryeministri grek.

Ai theksoi gjithashtu se procesi i anëtarësimit të Ballkanit Perëndimor në BE është bërë gjithnjë e më i ‘turbullt’, duke u zbehur në sytë e qytetarëve të zemëruar dhe të zhgënjyer.

“BE vazhdon të flasë për angazhim konkret ndaj Ballkanit Perëndimor dhe pret përmbushjen e plotë të kushteve dhe reformave. Megjithatë, rajoni e interpreton këtë si lodhje nga zgjerimi i BE-së. Lufta në Ukrainë vetëm sa e ka rritur fokusin e Bashkimit Evropian”, deklaroi.

Ndër të tjera, Mitsotakis theksoi se në përputhje me kriteret e përcaktuara, Ballkanit Perëndimor duhet t’i ofrohet integrimi në BE brenda vitit 2033.

“Duke u fokusuar në rajonin më të gjerë, BE-ja duhet të pranojë faktin se peizazhi i ri gjeopolitik ka imponuar një realitet tjetër, ai që përfshin vende si Ukraina dhe Moldavia. Duke analizuar atë që është bërë, BE-ja duhet të jetë krenare për gjithçka që ka arritur. Projekti evropian është një eksperiment unik që ka dëshmuar se është garantuesi më i suksesshëm i paqes, stabilitetit, luftës ekonomike dhe prosperitetit social në kontinent”, tha Mitsotakis.

Në fund të tekstit autorial, kryeministri grek konstatoi se në Ballkan ka interesa që synojnë të minojnë përpjekjet e Bashkimit Evropian.

“Në Ballkan, si kudo tjetër, ka akterë armiqësorë që kërkojnë të minojnë përpjekjet tona. Ata kanë pikëpamje të kundërta për botën dhe aspirata që shkelin të drejtat e njeriut, sundimin e ligjit dhe liritë themelore. Ata mendojnë se mund të thyejnë shpirtin njerëzor. Nga ngacmimet dhe ‘muskujt ushtarak’. Ne nuk mund të lejojmë që të krijohet një vakum për aktorë të tillë. Është koha për të mbajtur premtimin e Selanikut”, përfundoi kryeministri grek Kyriakos Mitsotakis. /Telegrafi/