Berisha: Opozita nuk duhet të propozojë emra për president, konsultimet e PS-së janë farsë

Ish-kryeministri i Shqipërisë, Sali Berisha tha sot se procesi i konsultimeve për zgjedhjen e presidentit të ri nuk është transparent.

Në një komunikim me gazetarët, Berisha e cilësoi ‘farsë’ sjelljen e kryeministrit Edi Rama me grupin e Partisë Socialiste duke shtuar se të njëjtën gjë po tenton të bëjë me opozitën.

“Dini gjë cilin kandidat kanë propozuar deputetët e PS? Ata mund të kenë propozuar 40 emra, por ai (Rama) do të zgjedhë atë që do, ndaj procesi ishte sekret”, tha ai.

Berisha pranoi se shumica i ka votat për ta zgjedhur presidentin, por me këtë sjellje tha ai, ‘Rama po poshtëron grupin e PS dhe shoqërinë civile’.

Lexo po ashtu PS nis procesin e propozimeve për presidentin e ri, Rama: Shqipërisë i duhet një president normal, e kundërta e Metës

Ai tha se opozita nuk duhet të propozojë emra për president në një kohë kur nuk i ka votat.

“Ka ide por sa racionale është? Mund të propozosh kur ke votat por kur nuk i ke është të tallesh me veten”, tha Berisha.

Për debatin brenda PD, Berisha tha se nuk e njeh Enkelejd Alibeajn si kryetar të grupit parlamentar.

“Do të mblidhet Kongresi do të zgjedhë Këshillin Kombëtar, do të zgjedhë nënkryetarin. Unë nuk e njoh atë (Alibeajn)”, tha Berisha.

“Në mbledhjen e grupit, theksova se opozita nuk mund të përfaqësohet me të emëruar nga Taulant Balla. PD-ja nuk do ta njohë një praktikë të tillë”, shtoi Berisha.

Gjithashtu ish-kryeministri deklaroi se nuk i njeh vendimet e kaluara për përjashtimet nga PD dhe pjesëmarrja e tij në mbledhje tha ai, e dëshmon këtë. /Telegrafi/