Disa nga zhvillimet e orëve të fundit në ditën e 51-të të agresionit rus në Ukrainë

Presidenti i Ukrainës, Volodymyr Zelensky, në një fjalim të fundit drejtuar kombit i cili shënon ditën e 50-të të agresionit rus ka thënë se ukrainasit janë treguar “njerëz të pathyeshëm të vendit më të guximshëm”.

Një deklaratë e tillë erdhi në ditën e 50-të të agresionit, ndërkohë që më poshtë ua sjellim disa nga zhvillimet e orëve të fundit – kur jemi në ditën e 51-të të agresionit rus në Ukrainë:

Lexo po ashtu Fjalimi i fundit i Zelensky drejtuar kombit shënoi ditën e 50-të të agresionit rus në Ukrainë - këto ishin fjalët e tij

• Forcat e armatosura të Ukrainës thonë se kanë zmbrapsur përpjekjet ruse për të pushtuar Popasna dhe Rubizhne në lindje, ku trupat pushtuese kanë zhvendosur fokusin në ditët e fundit.
• Në fjalimin e tij të enjten vonë, presidenti i Ukrainës, Volodymyr Zelensky, përshëndeti ukrainasit për mbijetesën e 50 ditëve nën sulmin rus dhe për të luftuar kundër trupave pushtuese.
• Në një intervistë për BBC, Zelensky veçoi Gjermaninë dhe Hungarinë, duke i akuzuar ata për bllokimin e përpjekjeve për embargo të shitjeve të energjisë, nga të cilat Rusia do të arrijë deri në 326 miliardë dollarë këtë vit.
• Shtëpia e Bardhë tha se presidenti amerikan Biden nuk do të vizitojë Ukrainën. Presidenti ka thënë se po shqyrton dërgimin e një zyrtari të lartë në kryeqytetin, Kiev.
• Lajmi për fundosjen e anijes luftarake ruse Moskva – për të cilën Ukraina thotë se u godit nga raketat e saj – ka frymëzuar banorët e Kievit që të nxjerrin një pullë postare përkujtimore.
• Drejtori i CIA-s, William Burns, ka paralajmëruar se përdorimi i mundshëm rus i armëve bërthamore “me rendiment të ulët” nuk mund të “merret lehtë”, megjithëse ka pak prova praktike për të përforcuar një shqetësim të tillë.
• Fqinja e Ukrainës, Moldavia, një ish-republikë sovjetike, ka ndaluar simbolet ruse të luftës, duke përfshirë shkronjat Z dhe V. /Telegrafi/