Zelensky: Situata në Ukrainën lindore mbetet e rëndë

Presidenti i Ukrainës, Volodymyr Zelensky, ka mbajtur fjalimin e tij në orët e vona të natës.

Dhe ndër tjerash, ai ka thënë se duket se trupat ruse po tërhiqen nga veriu i vendit, duke e përshkruar tërheqjen si “të ngadaltë por të dukshme”, përcjell Telegrafi.

Zelensky shtoi se situata në Ukrainën lindore mbetet e rëndë, ndërsa beson se Rusia po përgatitet për sulme të reja në rajonet Donbas dhe Kharkiv.

Ndërsa, duke folur në një intervistë për Fox News, udhëheqësi ukrainas theksoi se duket se sanksionet e vendosura ndaj Moskës nga Perëndimi po funksionojnë.

Megjithatë, Zelensky vlerëson se nevojitet presion i mëtejshëm.

Lexo po ashtu Pamje që tregojnë momentin kur “Ukraina shkatërron depon e karburantit, në sulmin e parë ajror në territorin rus”

Ndërkohë, një kolonë e Kryqit të Kuq që udhëton për në qytetin ukrainas të Mariupolit do të bëjë një tjetër përpjekje për të evakuuar civilët nga porti i rrethuar.

Mariupoli është shënjestruar pamëshirshëm nga rusët që në ditët e para të agresionit pesë javor.

Vlerësohet se rreth 100,000 njerëz janë të bllokuar atje me pak qasje në ushqim dhe ujë.

Komiteti Ndërkombëtar i Kryqit të Kuq (KNKK) dërgoi një ekip të premten për të udhëhequr rreth 54 autobusë ukrainas dhe automjete të tjera private për të dalë jashtë qytetit.

Por ata u kthyen pasi gjetën se rrethanat ishin shumë të rrezikshme. /Telegrafi/