Gripi i shpendëve, ndalohet shitja dhe transporti i pulave në Durrës, Dibër dhe Korçë

Ministria e Bujqësisë në Shqipëri ka njoftuar sot ndalimin e shitjes dhe transportit të shpendëve të gjalla në mjediset e hapura dhe tregjet e kafshëve të gjalla në qarqet e Durrësit, Dibrës dhe Korçës ku deri tani janë konfirmuar vatra të sëmundjes së gripit të shpendëve.

Në një njoftim për shtyp, Ministria e Bujqësisë ka theksuar se gjatë ditës së djeshme nuk ka pasur asnjë rast të dyshimtë të konstatuar në kontrollet e ministrisë apo raportuar në numrin e gjelbër.

Sipas ministrisë, aktualisht “po respektohen procedurat e shuarjes së vatrës, po kryhet tamponimi i zonës sipas niveleve të rrezes, po komunikohet risku për fermerët dhe veterinerët e zonës, si dhe është siguruar baza materiale e ajo mbrojtëse për veterinerët”.

“Në të gjithë territorin e vendit deri mbrëmë në darkë kemi 382, 672 shpendë të ngordhur. Vazhdon procesi për eliminimin dhe asgjësimin e kafshëve që po ngordhin”, ka shtuar ministria.

Sipas ministrisë, nga kontrollet e ushtruara nga Autoriteti Kombëtar i Ushqimit në të gjithë territorin e vendit deri tani nuk janë gjetur shkelje.

Ministria ka sqaruar për konsumatorët se nuk ka asnjë rrezik si për mishin ashtu dhe për vezët të cilat blihen nga operatorët e licencuar sepse produktet janë të kontrolluara.

“Nuk ka asnjë rrezik nga konsumi i mishit dhe vezëve të gatuara me temperature më të larta se 70 gradë Celsius si është dhe procedura normale e gatimit”, ka shtuar ministria. /Telegrafi/