Ylli i “90 Day Fiance”, Yara Dufren rrëfen për familjen dhe miqtë që ndodhen në Ukrainë pas pushtimit rus

Ylli televiziv, Yara Dufren, ka qëndruar në kontakt me familjen dhe miqtë e saj në Ukrainë, ndërsa po vazhdon të lutet për sigurinë e tyre mes pushtimit rus.

Dufren, 27-vjeçe, e cila është një fytyrë e njohur për shikuesit e “90 Day Fiance”, ka lindur dhe është rritur në Ukrainë.

Ajo aktualisht jeton në Covington, Luiziana, ku ka marrë pjesë në mitingje për të mbështetur vendin e saj të lindjes.

Duke folur për Fox News, ajo tha se është e lumtur që të dashurit e saj janë të sigurt në këtë moment, por foli për rreziqet me të cilat po përballen ende pasi po vriten familje dhe fëmijë të pafajshëm.

“Familja ime është mirë. Ata të gjithë janë në një zonë të sigurt tani”, tha Dufren.

“Ata kanë vetëm disa probleme të vogla me mungesën e ushqimit dhe për të marrë gjëra nga dyqanet. Jam mirënjohëse për sigurinë e tyre dhe shpresoj dhe lutem që edhe të tjerët të gjejnë një vend të sigurt”.

Menjëherë pasi nisi pushtimi i Rusisë ndaj Ukrainës, Yara tha se miqtë e saj – shumica që jetojnë në Kiev – u zgjuan nga shpërthimet e bombave.

“Ata e patën shumë të vështirë. Unë kam ende një mik të ngushtë që mbetet në Kiev. Ata nuk jetojnë tani në kushte shumë komode, por janë të sigurt. Disa nga miqtë e mi janë aktualisht në një strehë për të pastrehët sepse nuk ka vende ku ata do të qëndrojnë”, tha ylli.

Gjatë javës së fundit, biondja ka marrë pjesë në mitingje në New Orleans, të cilat i sollën asaj një ndjenjë rehatie gjatë kësaj kohe të tmerrshme.

“Ne patëm një tubim të organizuar dhe paqësor në New Orleans. Shumë njerëz nga i gjithë shteti dhe madje edhe nga shtetet e tjera erdhën për të na mbështetur, gjë që ishte e mrekullueshme”, tha ajo.

“Ne po përpiqemi të japim para për të mbështetur drejtpërdrejt popullin e Ukrainës që ka nevojë për ushqim dhe furnizime tani”, vazhdoi aktorja. /Telegrafi/