“E papranueshme”: Vjen edhe reagimi i Turqisë pas njohjes nga Rusia të dy rajoneve në Ukrainë

Vendimi i Rusisë për të njohur dy rajone në Ukrainën lindore si të pavarura është i papranueshëm, ka thënë Ministria e Jashtme e Turqisë.

“Vendimi i Rusisë për të njohur të ashtuquajturat Republika Donetsk dhe Luhansk përbën një shkelje të qartë jo vetëm të marrëveshjeve të Minskut, por edhe të unitetit politik, sovranitetit dhe integritetit territorial të Ukrainës. Ne e konsiderojmë të ashtuquajturin vendim të Rusisë si të papranueshëm dhe e kundërshtojmë atë”, thuhet në një deklaratë me shkrim nga ministria, përcjell Telegrafi.

Sipas Daily Sabah, ministria nënvizoi më tej angazhimin e Turqisë për të ruajtur unitetin politik dhe integritetin territorial të Ukrainës, ndërsa u bëri thirrje të gjitha palëve të respektojnë ligjin ndërkombëtar.

Lexo po ashtu Shefi i spiunazhit të Rusisë filloi të belbëzonte ndërsa Putini kërkoi nga ai 'të ishte i drejtpërdrejt' rreth dekretit për dy rajonet në Ukrainën lindore

Turqia, anëtare e NATO-s, e cila ndan një kufi detar me Ukrainën dhe Rusinë në Detin e Zi, ka lidhje të mira me të dy fqinjët e saj dhe ka ofruar të ndërmjetësojë për krizën, ndërsa paralajmëron Moskën kundër pushtimit të Ukrainës.

Ndërsa forcon bashkëpunimin për mbrojtjen dhe energjinë, Turqia ka kundërshtuar politikat e Moskës në Siri dhe Libi, si dhe aneksimin e saj të Gadishullit të Krimesë në vitin 2014.

Ajo ka shitur gjithashtu drone të sofistikuar në Ukrainë, duke zemëruar Rusinë.

Ndryshe, përveç Turqisë, edhe fuqitë perëndimore reaguan me shpejtësi ndaj vendimit të së hënës nga presidenti rus Vladimir Putin për të njohur pavarësinë e dy republikave të vetëshpallura në Ukrainën lindore dhe një dislokim të trupave në rajon, duke dënuar veprimin e Moskës dhe duke bërë thirrje për sanksione.

Shtetet e Bashkuara dhe aleatët e saj sulmuan Rusinë gjatë një sesioni urgjent të Këshillit të Sigurimit të hënën, duke denoncuar njohjen nga Vladimir Putin të zonave të kontrolluara nga rebelët në Ukrainë dhe vendosjen e trupave si një shkelje e rëndë e ligjit ndërkombëtar dhe “pretekst për luftë”.

Lexo po ashtu Presidenti ukrainas: Ne nuk kemi frikë nga asgjë dhe askush

Ndërsa ambasadori i Ukrainës, Sergiy Kyslytsya këmbënguli që kufijtë e vendit të tij mbeten “të pandryshueshëm” pavarësisht veprimeve të Rusisë, shkruan France24, përcjell Telegrafi.

Një reagim rreth zhvillimeve të fundit atje ka ardhur edhe nga presidenti ukrainas Volodymyr Zelensky.

Ai akuzoi Rusinë për prishjen e bisedimeve të paqes dhe përjashtoi mundësinë e bërjes së ndonjë lëshimi territorial në një fjalim drejtuar kombit në orët e para të mëngjesit të së martës.

Presidenti rus Vladimir Putin nënshkroi të hënën dekrete për njohjen e sovranitetit të Luhanskut dhe Donetskut, në një ngjarje televizive në të cilën ai mbajti një fjalim duke vënë në dyshim të drejtën e Ukrainës për shtetësi. /Telegrafi/