Abdixhiku reagon për rritjen e çmimeve: Paaftësia e Qeverisë Kurti po kushton shumë, i ka braktisur detyrat e saj

Kryetari i LDK-së dhe deputeti Lumir Abdixhiku, ka reaguar për rritjen e çmimeve të produkteve bazike ushqimore.

Në një shkrim në Facebook, ai tha se Kosova po përballet me valën më të rëndë të papërballueshmërisë së çmimeve në historinë e saj.

“Sipas Agjencisë së Statistikave të Kosovës – raportit të publikuar sot – për vetëm një vit, çmimet e produkteve më bazike ushqimore e të shërbimeve kanë prekur rekorde të reja në vend”, tha Abdixhiku.

Tutje përmendi edhe produktet të cilat sipas tij janë rritur dukshëm në 2022.

“Mielli është shtrenjtuar për 29%, buka për 17%, vaji për 46%, sheqeri për 23%, patatet për 24%, domatet për 30%, nafta e benzina për gati 30%, e energjia elektrike – pa subvencion – nga 85-104%. Janë çmime të rritura për vetëm 1 vit. Kjo rritje enorme, e paprecedentë deri më tani, vendosë kosovarët në krizën e papërballueshmërisë së përditshme”, tha ai.

Lexo po ashtu Rritja e çmimeve në Kosovë – buka, qumështi, vaji, transporti dhe rryma produktet që u shtrenjtuan më së shumti brenda një viti

Sipas tij, përballë kësaj krize, Qeveria Kurti ka braktisur detyrat e saj.

“Në kulmin e rritjes, ajo vazhdon të jetë vetëm spektatore. Vështron krizat barabartë me secilin qytetar. Asnjë masë fiskale, asnjë politikë qeveritare, asnjë pako zhvillimore e ndërmarrë deri më tash. Paaftësia qeverisëse kushton. Paaftësia e kësaj Qeverie kushton shumë”, u shpreh deputeti i LDK-së.

“Politika publike duhet të jetë e gjallë. Vizionet zhvillimore duhet të jenë të mëdha; të guximshme. Ngurtësimi në retorikë të thatë, herët apo vonë sjellë krizë. Dhe me çmime inflative si këto, ky vend veçse po futet në krizë”, tha në fund./Telegrafi/