KEDS: Deri pas mesnatës nuk do të ketë ndërpreje të energjisë elektrike

Zëdhënësi i Kompanisë Kosovare për Distribuim të Energjisë Elektrike (KEDS), Viktor Buzhala, ka bërë të ditur se deri pas mesnatës nuk do të ketë mungesë të energjisë elektrike.

“Ka pasur reduktime në orët e mëngjesit, por sonte deri në mesnatë nuk do ketë ndërprerje të energjisë për qytetarët”, u shpreh shkurt Buzhala.

Ndërkaq Kuvendi nesër duke filluar nga ora 11:00 do të mbajë një seancë të jashtëzakonshme në të cilën do të shqyrtohet vendimi i Qeverisë për masat e emergjencës në furnizimin e energjisë në vend.

Qeveria më 24 dhjetor mori vendimin për masat e emergjencës në furnizimin e energjisë, dhe të njëjtat i procedoi Kuvendit për shqyrtim dhe miratim në bazë të Ligjit për energji.

Të hënën gjatë ditë, kryeministri Albin Kurti ka thënë se nuk ka zgjidhje të mirë në situatën aktuale të krizës energjetike në të cilën gjendet Kosova.

Ai në Facebook ka shkruar se Kosova është dashur të mendojë shumë më herët që të mos vijë në këtë situatë.

“Janë dy faktorë të brendshëm që na kanë sjellë në këtë krizë. Mungesa e vizionit për zhvillim socio-ekonomik të Kosovës, me planifikim të sektorit energjetik për furnizim të qëndrueshëm dhe çmime të përballueshme, si për amvisëritë ashtu edhe për industrinë. Së dyti, korrupsioni qeveritar i bërë zakon, e që kulmoi me privatizimin e rrjetit të shpërndarjes dhe furnizimit për vetëm 26 milionë euro”, ka shkruar Kurti, duke shtuar se “reduktimet me energji elektrike pothuajse janë hequr”.

“Me shtimin e likuiditetit dhe subvencionimin e importit kemi arritur të stabilizojmë furnizimin dhe reduktimet pothuajse janë hequr”, shkruan Kurti./Telegrafi/