BE mund ta ulë taksën për karburantet, Polonia kërkon ta heq TVSH-në për ushqimet bazike

Polonia dëshiron që Bashkimi Evropian ta lejojë atë të ulë tatimin mbi vlerën e shtuar (TVSH) për karburantet motorike në mënyrë që të zbutë ndikimin e inflacionit në rritje, tha kryeministri polak, Mateusz Morawiecki.

Partia në pushtet e Polonisë për Ligjin dhe Drejtësinë (PiS) ka miratuar një paketë masash që përfshin taksat mbi benzinën, gazin, ngrohjen dhe energjinë elektrike, si dhe përfitime në para për familjet.

Ata gjithashtu duan të ulin në zero TVSH-në për ushqimet bazike, por thonë se kanë nevojë për miratimin e Brukselit për ta bërë këtë për shkak të rregullave të BE-së.

Ministri i Financave, Tadeusz Koscinski i tha radios shtetërore se Polonia dëshiron të ulë taksën e karburantit nga 23 për qind në tetë për qind, raporton reuters.

“Kam pyetur Komisionin Evropian për uljen e TVSH-së për karburantin, askush tjetër në Evropë nuk e ka bërë atë … Ne po përpiqemi të gjejmë zgjidhjet e duhura së bashku, sigurisht që do të duhen edhe disa javë”, tha kryeministri polak.

Inflacioni në Poloni arriti në 7.8 për qind në muajin nëntor, sipas të dhënave zyrtare. /Telegrafi/