Ndryshimet në statut, Berisha: Ky kuvend sjell PD në themelet e saj

Pas votimit për ndryshimin e statutit të PD dhe vendimit për të hedhur në votim të fshehtë shkarkimin e kryetarit aktual të partisë Lulzim Basha, Sali Berisha u ngjit në podiumin e improvizuar të Air Albania para mijëra delegatëve të PD.

Sali Berisha u shpreh se kuvendi i kësaj të shtune sjell PD në themelet e saj.

“Ky kuvend monument i lirisë së shqiptarëve, monument i rithemelimit të PD. Ta shndërrojmë PD-në në partinë e idealeve tuaja, të vlerave konservatore, interesin kombëtar, integrimeve euroatlantike, por mbi të gjitha në partinë e anëtarit, në forcën politike që nesër në pushtet do të ketë në epiqendër qytetarin shqiptar, hallet dhe interesat e tij; në forcën politike që nesër në pushtet do të vendosë vlerat më të mëdha në shoqëri, dinjitenin njerëzor, familjen shqiptare, ekonominë e tregut, pronën.

Ky tubim i jashtëzakonshëm, ky kuvend i pashembullt në histori. Ky kuvend sjell PD në themelet e saj, si forcë politike të interesit kombëtar që sot vuan më shumë se kurdoherë tjetër, që nga diktatura. Sot përulem në mirënjohje të pakufishme ndaj studentëve liberatorë të dhjetorit ’90”, tha Berisha, raporton A2.