Publikohet “Family”, Bebe Rexha duket e mrekullueshme në klipin e ri me David Guettan, Ty Dolla Sign dhe A Boogie Wit da Hoodie

Ashtu siç edhe ishte paralajmëruar, është publikuar të martën klipi “Family” i artistëve të famshëm: David Guetta, Bebe Rexha, Ty Dolla $ign dhe A Boogie Wit da Hoodie.

Kënga e cila ka qenë deri më tani e publikuar në kanalin YouTube vetëm në versionin audio, është shoqëruar tashmë edhe me një klip të veçantë dhe plot ngjyra, i cili i përshtatet këngës.

Ashtu si thuajse në çdo paraqitje tjetër, këngëtarja shqiptare është shfaqur mjaft atraktive në videon muzikore të kësaj kënge, duke bërë për vete shikuesit me pamjen e saj.

“Familja është gjithçka për mua. Ndonjëherë gjen miq që bëhen familja jote, dhe kjo është ajo për të cilën bëhet fjalë kjo këngë. Ndarja e kësaj eksperience me David Guetta, Ty Dolla $ign dhe A Boogie With A Hoodie e bëri atë edhe më të veçantë”, ka thënë Bebe Rexha në lidhje me këngën në fjalë.

Rexha ka bashkëpunuar edhe më parë me DJ-në e njohur David Guetta në këngët “Say My Name” dhe “Hey Mama”.

Të dy këto bashkëpunime kanë rezultuar të suksesshme pasi “Say My Namye” numëron afro 870 milionë klikime, ndërsa “Hey Mama” ka tejkaluar shifrën e 1.4 miliardë.

Ky vit ka qenë relativisht i suksesshëm për artisten me origjinë shqiptare, pasi sivjet ajo publikoi edhe albumin e saj të dytë në karrierë, me titull “Better Mistakes”.

Bebe Rexha në një intervistë ekskluzive për Telegrafin në korrik të këtij viti, foli për albumin në fjalë, duke treguar arsyen se pse vendosi që në “Better Mistakes” të trajtojë këngë me çështje të shëndetit mendor.

“Unë thjesht dua, e dini, njerëzit dhe fëmijët në të gjithë botën të mos ndihen vetëm dhe të dinë se ata janë të fortë dhe ata mund të kapërcejnë gjithçka për të cilën ata mendojnë. Dhe, thjesht doja të shkruaja këngë që i bëjnë njerëzit të mos ndihen sikur janë vetëm dhe mund të dëgjojnë këngët e mia dhe ta dinë që unë jam aty për ta”, ka thënë për Telegrafin këngëtarja, emri i vërtetë i së cilës është Bleta.

Krahas albumit dhe bashkëpunimit me David Guetta-n, Rexha këtë vit realizoi edhe dy bashkëpunime të tjera shumë të pëlqyera me Topic dhe Masked Wolf. /Telegrafi/