Panik për mungesë të ushqimeve në Kinë – radhë të gjata në dyqane për furnizim

Një mesazh nga Ministria Kineze e Tregtisë se është e nevojshme të krijohen rezerva ushqimore ka shkaktuar panik tek kinezët.

Mesazhi u kërkon autoriteteve lokale që të sigurojnë se qytetarët e tyre të kenë një “furnizim adekuat” të nevojave themelore këtë dimër. Ai gjithashtu udhëzon këto qeveri të mbajnë çmimet e ushqimeve të qëndrueshme – gjë që ka qenë një shqetësim javët e fundit pasi kushtet ekstreme të motit, mungesat e energjisë dhe kufizimet e koronës kërcënojnë furnizimet.

Por direktiva e së hënës tërhoqi vëmendjen e qytetarëve si kurrë më parë. Pjesërisht, kjo duket të jetë për shkak se përfshin deklarata për nevojën që autoritetet lokale të inkurajojnë familjet që të grumbullojnë “nevojat e përditshme”. Edhe nëse njoftimi nuk ishte i destinuar për një familje mesatare, shumë e perceptuan atë si një paralajmërim personal, shkruan cnn.

Qeveria “as nuk na tha të ruanim mallrat kur shpërtheu epidemia e CoOVID-19 në fillim të vitit 2020”, shkroi një përdorues i Weibo në fillim të kësaj jave.

Situata është përshkallëzuar që atëherë. Një video, e publikuar në Weibou shtetëror nga China News Weekly, tregon radhë të gjata blerësish në Changzhou, një qytet në provincën Jiangsu. Karrocat e tyre janë plot me produkte dhe furnizime të tjera, ndërsa raftet e dyqaneve janë bosh.

Ushqimi është një çështje shumë e ndjeshme në Kinë. Uria e Madhe e Kinës gjatë viteve 1950 dhe 1960 çoi në vdekjen e dhjetëra miliona njerëzve.

Tragjedia ka mbetur në kujtesën e gjallë të shumë njerëzve në vend. Dhe ndërkohë që ekonomia e Kinës ka pësuar një transformim dramatik që nga ajo kohë, shqetësimet për sigurinë ushqimore vazhdojnë ende: qeveria, për shembull, zbuloi së fundmi një “plan veprimi” që inkurajon njerëzit të mos porosisin më shumë ushqim sesa kanë nevojë dhe të raportojnë ushqime të kota në restorante. /Telegrafi/