Konfiskohet drogë në Suharekë, policia në kërkim të dyshuarit

Policia e Kosovës, konkretisht  Drejtoria për Hetimin dhe Luftimin e  Narkotikëve – Njësia në Prizren dhe Njësia e Ferizajt, gjatë një pune operative dhe marrjes se informatave nga burime relevante,  me datë 23.10.2021 me urdhër verbal të Prokurorit të Shtetit dhe aprovimin e Gjyqtarit të Procedurës Paraprake, ka realizuar një bastisje në shtëpinë dhe objektet përcjellëse të të dyshuarit  me iniciale (K.B.) në  fshatin  Sallagrazhd, Komuna e Suharekës me dyshimin se në shtëpinë e tij gjendet një sasi e substancave narkotike të llojit Marihuanë.

“Asistim në këtë operacion kanë ofruar edhe Njësitet për reagim të shpejtë (NJRSh) patrullat policore të stacionit Policor në Suharekë, si dhe forenzika rajonale. Sipas detyrës zyrtare janë ftuar edhe  dy avokat mbrojtës”, thuhet në njoftim.

Policia ka njoftuar se gjatë bastisjes janë gjetur dhe sekuestruar dëshmitë/provat si në vijim: njё thes najlloni  i zi me substancë të dyshuar narkotike të llojit marihuanë, pas matjes rezulton me peshë  pesë kg; njё  thes najlloni  i zi  me substancë të dyshuar narkotike të llojit marihuanë, pas matjes rezulton me peshë pesë kg; një thes najlloni i zi me substancë të dyshuar narkotike të llojit marihuanë, pas matjes rezulton me peshë  katërqind (400) gram, një peshore elektrike ngjyrë e bardhë, tri rolle plastike që shërbejnë për paketim të substancës narkotike dhe një aparat elektronik për shërbim të  vakumimit të qeseve plastike –paketim të marihuanës.

“Njësitet relevante policore janë duke zhvilluar hetime lidhur me rastin dhe po punojnë me intensitet te madh në arrestimin e personit të dyshuar që këto momente ndodhet në arrati.

Policia e Kosovës është e përkushtuar në parandalimin dhe luftimin e veprave penale në përgjithësi, veçanërisht masa rigoroze ligjore do të aplikohen ndaj personave të përfshirë në përdorim shitje apo abuzim me substanca narkotike”, thuhet në njoftim. /Telegrafi/