Prapaskenat në ndeshjen Kosovë-Gjeorgji: Koreografia fantastike e Dardanëve, largimi i topit nga vija, Sagnol i revoltuar me gjyqtarin dhe dhurimi i fanellave

Kosova ka pësuar humbje nga Gjeorgjia me rezultat 2-1 në kuadër të kualifikimeve për në Kampionatin Botëror.

Të besuarit e Bernard Challandes, nuk ishin në lartësinë e duhur në një ndeshje që solli edhe disa momente interesante.

Redaksia e Telegrafi Sport ka zgjedhur disa momentet më interesante nga ky takim që solli shumë dëshpërim.

Koreografia fantastike e Dardanëve

Kishte kohë që Kosova nuk kishte luajtur një ndeshje me kaq shumë shikues. Dardanët ishin përgatitur mirë për këtë takim. Ata kishin përgatitur në start një koreografi fantastike: “Qysh kur dielli ngrohë këtë tokë ne jemi këtu, Kosova zgjedhje zemre, jo zori”.

Pllakos heshtja pas golit të Gjeorgjisë

Tifozët ishin të zhurmshëm në fillimin e ndeshjes, por një gabim i Aro Muriq bëri që të kishte heshtje totale në momentin që shënoi Gjeorgjia. Dëgjohej vetëm festa e mysafirëve.

Shpërthimi i Challandes

Në stres për këtë ndeshje ishte edhe Bernard Challandes, që shpërtheu në një moment kur gjeorgjiani Guram Giorbelidze shkaktoi faul në Elbasan Rashanin, ndërsa gjyqtari akordoi goditje dënimi për Gjeorgjinë.

Largimi i topit nga vija, tifozët brohoritën gol

I gjithë stadiumi duke brohoritur: “Gol, gol, gol”, në momentin që gjyqtari u konsultua me VAR nëse topi ka kaluar vijën e portës pas goditjes së Rashanit në minutën e 40-të.

Sagnol i revoltuar me gjyqtarin

Revoltimi i Willy Sagnol me gjyqtarin ishte i madh gjatë rrugës për te dhomat e zhveshjes. Francezi bëri me duar duke u ankuar për mos akordim të penalltisë në fund te pjesës se parë.

Mesazhi i dytë i ‘Dardanëve’

Në fillimin e pjesës së dytë, i Dardanëve shfaqën edhe një mesazh: ‘Ne jemi mbështetës, jo politikan’.

Shala dhe Ujkani në këmbë

Herolin Shala dhe Samir Ujkani gjatë tërë ndeshjes kanë qëndruar në këmbë duke i motivuar bashkëlojtarët si dy më të vjetrit të ekipit. Nuk është ndeshja e parë që dyshja bëjnë këtë gjë.

Rasti i Selmanit, zhgënjim në bankën rezervë

Rastin më të mirë për barazim e kishte Astrit Selmani i cili i vetëm me portieri gjuajti mbi portë.

Zhgënjim i madh në bankën rezervë.

Lojtarët ia dhuruan fanellat ‘Dardanëve’

Pas ndeshjes lojtarët përshëndetën tifozët, që ishin të zhgënjyer me humbjen. Ata i dhuruan fanellat për tifozët.

Dresevic bën gjestin bujar i dhuron fanellën një personi në karrocë

Ibrahim Dresevic në rrugën për të shkuar në zhveshtore u ndal të një tifoz që ishte me karrocë, duke ia dhuruar fanellën.

/Telegrafi/