Numër rekord i ri i infeksioneve me COVID-19 në New South Wales të Australisë

Shteti australian i New South Wales (NSW) raportoi numrin e tij më të lartë të infeksioneve ditore me coronavirus të mërkurën, pavarësisht bllokimeve në vend në Sidnei dhe pjesë të tjera të shtetit.

Sipas mediave të huaja, përcjell Telegrafi, kryeministrja e NSW, Gladys Berejiklian, tha se 633 raste të reja të transmetuara në vend u regjistruan në 24 orë deri në mbrëmjen e së martës dhe u konfirmuan edhe tre vdekje të tjera të lidhura me Covid-19, duke e çuar numrin e jetëve të humbura që nga fillimi i pandemisë në 116.

Të paktën 92 nga rastet e reja ishin infektive në komunitet, megjithëse statusi i izolimit të shumicës së rasteve ishte ende nën hetim, sipas autoriteteve shëndetësore.

Greater Sydney i është nënshtruar urdhrave të qëndrimit në shtëpi për më shumë se shtatë javë, me zona të tjera në shtet që i bashkohen kryeqytetit në bllokim pasi varianti Delta vazhdon të bëjë kërdi.

Territori i Kryeqytetit Australian (ACT), shtëpia e kryeqytetit Canberra, hyri në një bllokim të menjëhershëm pasi regjistroi rastin e tij të parë Covid-19 në komunitet në më shumë se një vit javën e kaluar.

Ky territor të mërkurën regjistroi 22 infeksione të reja, duke e çuar totalin e rasteve aktive në 67.

Kryeministri i ACT, Andrew Barr tha se, që nga fillimi i bllokimit u kryen gati 25,000 teste, ekuivalente me rreth 6 për qind të popullsisë së territorit.

Rreth 12,500 njerëz, pak më pak se 3 për qind e popullsisë së ACT, ishin në karantinë, shtoi Barr.

Victoria ndërkohë regjistroi 24 raste të reja në vend. Bllokimi në kryeqytetin shtetëror Melburn, i gjashti i tij, i cili u vendos në fillim të muajit të hënën u zgjat deri të paktën më 2 shtator.

Australia, me 25 milionë banorët e saj, ishte shumë e suksesshme në luftën kundër pandemisë për një kohë të gjatë për shkak të masave jashtëzakonisht të rrepta, përfshirë mbajtjen e kufirit të saj ndërkombëtar të mbyllur me pak përjashtime që nga marsi i vitit 2020.

Sidoqoftë, një pjesë e madhe e popullsisë është përsëri në bllokim për shkak të përhapjes së variantit Delta dhe një shtrirje të ngadaltë të vaksinimeve.

Deri më tani, rreth 27 për qind e australianëve mbi moshën 16 vjeç janë plotësisht të vaksinuar dhe pothuajse gjysma e personave mbi 16 vjeç kanë pasur të paktën një dozë të vaksinës.

Mbi 40,000 raste janë konfirmuar në mbarë vendin, dhe mbi 960 njerëz kanë vdekur, vdekje kjo si pasojë apo të lidhura me Covid-19. /Telegrafi/