Ndërpritet seanca e Kuvendit të Kosovës, shtyhet votimi për shkarkimin e 5 anëtarëve të KPMShCK

Seanca e Kuvendit të Kosovës është ndërprerë për të vazhduar një ditë tjetër, dhe me këtë është shtyrë edhe votimi për shkarkimin e pesë anëtarëve të Këshillit të Pavarur Mbikëqyrës për Shërbimin Civil të Kosovës.

Pas pauzës, Kuvendi prapë nuk arriti të votojë për këtë pikë të rendit të ditës, dhe pas një konsulte të kryesuesit të Kuvendit, Bekim Arifi me shefat e Grupeve Parlamentare, u vendos që seanca të shtyhet.

Ndryshe, para se Kuvendi i Kosovës të shkonte në pauzë vetëm 55 deputetë morën pjesë në procesin e votimit, andaj në mungesë të vendimmarrjes kjo pikë e rendit të ditës u shty.

Megjithatë, tentimi për shkarkim të këtij këshilli u kundërshtua nga opozita dhe u konsiderua si tendencë arbitrare për kapjen e institucioneve.

Deputeti i Lëvizjes Vetëvendosje, Armend Muja, duke arsyetuar shkarkimin, tha se i njëjti duhet të bëhet për shkak të politizimit dhe emërimet jo meritore.

“Kërkojmë të votohet shkarkimi i këtyre anëtarëve për arsye të politizimit dhe emërimet jo meritore që kanë qenë një nga shqetësimet kryesore të BE-së, e të cilat janë shfaqur në raportin e progresit prej vitit 2013 deri 2020. Politizimi dhe nominimi nepotist dhe jo meritor…Ky bord nuk është meritor, është politikë nga natyra”, tha Muja.

Lexo po ashtu S’ka kuorum për shkarkimin e 5 anëtarëve të KPMShCK, Kuvendi shkon në pauzë

Këtë arsyetim të deputetit Muja e kundërshtoi kolegu i tij nga radhët e Partisë Demokratike të Kosovës, shefi i grupit parlamentar Abelard Tahiri, i cili tha se me këtë veprim deputetët e mazhorancës po bëjnë vepër penale.

“Të jesh deputet i Kuvendit të Kosovës nuk do të thotë që ke mundësi të abuzosh me detyrën zyrtare. Njëjtë sikur ministër, kemi pasur raste kur atyre iu ka ngritur aktakuza për keqpërdorim të detyrës zyrtare. Sot këta deputetë që janë sponsorizua të kësaj iniciativë, jo ata që e votojnë, po bëjnë një vepër të pastër penale. Duke keqpërdorur pozitën e deputetit, duke propozuar shkarkimin e këtyre anëtarëve pa pasur bazë ligjore dhe vendim të ndonjë gjykate që këta kanë bërë veprime në kundërshtim me ligjin. Në anën tjetër, nuk mund të bësh vlerësim kolektiv, por për secilin”, tha Tahiri.

Edhe deputeti nga radhët e LDK-së, Agim Veliu akuzoi Lëvizjen Vetëvendosje në pushtet për shkatërrim të institucioneve të pavarura kushtetuese.

“Shprehim shqetësimin tonë me këtë veprim të komisionit, i cili me shumicë një partiake ka vendosur t’i rekomandojë kuvendit në mënyrë të kundërligjshme për ndërprerje të mandatit të anëtarëve të Këshillit të Pavarur Mbikëqyrës për Shërbimin Civil të Kosovës… Është një logjikë arbitrare e shkatërrimit të institucioneve të pavarura kushtetuese”, tha Veliu.

Kritika ndaj Lëvizjes Vetëvendosje ka shprehur edhe shefi i grupit parlamentar të Aleancës për Ardhmërinë e Kosovës (AAK), Besnik Tahiri.

“Ky këshill ka një mandat që buron prej këtij Kuvendi. Ndërprerja e këtij mandati do të duhej të vinte mbi një vlerësim që duhet të bënte komisioni apo një trup i cili do të analizonte shkeljet e këshillit si organ kolektiv dhe jo si anëtarë dhe njerëz individualë në këtë këshill”, tha Tahiri. /Telegrafi/