Raporton për një shpërthim në veri të Mitrovicës, por del se ishte i dehur

Një person ka raportuar se derisa kishte qenë në vendin e punës-sigurim fizik, kishte dëgjuar një shpërthim.

Në raportin e Policisë së Kosovës, rasti ka ndodhur të premten rreth orës 21:00 në rrugën “Kollashinka”, në Mitrovicë.

Siç thuhet në raport, njësitë relevante policore kanë dalë në vendin ku dyshohej se kishte ndodhë shpërthimi, por nuk kanë vërejte asgjë të dyshuar.

“Ankuesi mashkull kosovar ka raportuar se derisa kishte qenë në vendin e punës-sigurim fizik, kishte dëgjuar një shpërthim. Njësitë relevante policore kanë dalë në vendin ku dyshohej se kishte ndodhë shpërthimi, por nuk kanë vërejte asgjë të dyshuar. Në makineritë që shërbejnë për kryerjen e punimeve në atë vend nuk është vërejte asnjë lloj dëmi apo gjurme që mundë të jenë shkaktuar”, thuhet në raport.

Në raport tutje sqarohet se ankuesi është sjell në stacion policor të cilit ju ka bërë alkotesti dhe ka rezultuar se ai kishte qenë nën ndikim të alkoolit 1.70 promil.

“Janë bërë disa intervista me banorë të cilët banojnë në atë lokacion, por ata nuk kishin dëgjuar dhe vërejte diçka të dyshuar. Është njoftuar prokurori i cili ka urdhëruar që ankuesit t’i merret deklaratë me shkrim pas këndelljes, po ashtu dhe banorëve të rrethinës. Rasti- informata vazhdon të hetohet”, thuhet ndër të tjera në raport. /Telegrafi/