Prishtina konfirmon largimin e dy futbollistëve, Pefqeli dhe Gavazaj largohen nga kampioni

Dy futbollistët, Mergim Pefqeli dhe Enis Gavazaj, pas skadimit të kontratës me FC Prishtina, janë futbollistë të lirë.

Kampioni aktual me një publikim në faqen zyrtare ka njoftuar se dyshes nuk do t’i vazhdohet kontrata.

“Klubi i falënderon përzemërsisht për kontributin e dhënë për skuadrën, sidomos në vitin që klubi do të mbaj gjatë në mend”, thuhet një njoftim.

Mërgim Pefqeli, 27 vjeç, për Prishtinën këtë edicion ka regjistruar 20 ndeshje në tre garat zyrtare duke shënuar 4 gola dhe 2 asistime.

Pefqeli, vije nga shkolla e futbollit të klubit, kurse me skuadrën e parë gjithsejtë ka regjistruar katër sezone, 2016-2019 dhe 2020/21 duke zhvilluar 103 ndeshje zyrtare, 15 gola dhe 4 asistime.

Enis Gavazaj, 26 vjeç, te Prishtina ishte aktivizuar për herë të dytë gjatë këtij sezoni pas transferit nga Kukësi duke regjistruar 14 ndeshje në kampionat dhe kupë dhe duke shënuar 2 gola e 1 asistim.

Gavazaj, së pari ishte pjesë e Prishtinës në edicionin 2012/13 kur ishte transferuar nga Liria e Prizrenit e pastaj nga Prishtina në Gent të Belgjikës. Në dy edicione, 2012/13 dhe 2020/21, Gavazaj me Prishtinën ka regjistruar 36 paraqitje zyrtare, 3 gola dhe a 2 asistime./Telegrafi/