Tetë llojet e meditimit, zbuloni se cili përshtatet më shumë me personalitetin tuaj

Meditimi mund të jetë një traditë e lashtë, por ende praktikohet në kultura të ndryshme në të gjithë botën, për të krijuar një ndjenjë të brendshme qetësie dhe harmonie

Në ditët që po jetojmë, duket sikur nevoja për të pakësuar stresin është më e madhe, kështu edhe popullariteti i meditimit është në rritje.

Edhe pse nuk ka një mënyrë të drejtë ose të gabuar për të medituar, është e rëndësishme të gjeni një praktikë që plotëson nevojat dhe përshtatet me personalitetin tuaj.

Ekzistojnë tetë lloje të njohura praktikash meditimi.

Jo të gjitha stilet e meditimit janë të duhura për të gjithë. Këto praktika kërkojnë aftësi dhe mendësi të ndryshme.

Si ta kuptoni që një praktikë është e përshtatshme për ju?!

“Është ajo që ju bën të ndiheni rehat dhe të inkurajuar ta praktikoni vazhdimisht”, -thotë Mira Dessy, një autore meditimi.

Vazhdoni të lexoni për të mësuar më shumë rreth llojeve të ndryshme të meditimit dhe cili ju përshtatet.

1. Meditimi i vëmendjes

Meditimi i vëmendjes buron nga mësimet budiste dhe është teknika më e njohur e meditimit në Perëndim.

Në këtë rast, i kushtoni vëmendje mendimeve ndërsa ato kalojnë nëpër mendjen tuaj. Ju nuk i gjykoni mendimet ose të përfshiheni tek to. Thjesht vëzhgoni dhe mbani shënim çdo model.

Kjo praktikë ndërthurë përqendrimin me vetëdijen. Mund të jetë e dobishme të përqendroheni në një objekt ose në frymëmarrje, ndërsa vëzhgoni çdo ndjesi trupore, mendime apo ndjenja.

2. Meditim shpirtëror

Meditimi shpirtëror përdoret në fetë Lindore, si Hinduizmi dhe në besimin e krishterë.

Është i ngjashëm me lutjen, në atë që reflektoni mbi heshtjen përreth jush dhe kërkoni një lidhje më të thellë me Zotin ose Universin.

Meditimi shpirtëror mund të praktikohet në shtëpi ose në një vend të shenjtë.

3. Meditim i përqendruar

Ky lloj meditimi përfshin përqendrimin duke përdorur një nga pesë shqisat.

Për shembull, mund të përqendroheni në diçka të brendshme, si frymëmarrja juaj, ose mund të krijoni ndikime të jashtme për t’ju ndihmuar të përqendroni vëmendjen tuaj.

Si përshembull numërimi i rruazave apo vëzhgimi i dritës së qirinjve.

Kjo praktikë mund të jetë e thjeshtë në teori, por mund të jetë e vështirë për fillestarët ta mbajnë fokusin e tyre për më shumë se disa minuta.

4. Meditimi i lëvizjes

Edhe pse shumica e njerëzve mendojnë për yoga kur dëgjojnë meditim i lëvizjes, kjo praktikë mund të përfshijë ecjen nëpër pyje, kopshtarinë dhe forma të tjera të lehta të lëvizjes. Është një formë aktive e meditimit ku lëvizja ju udhëzon.

Meditimi i lëvizjes është i mirë për njerëzit që gjejnë paqe në veprim.

5. Meditimi me mantra

Meditimi me mantra është i spikatur në shumë mësime, përfshirë traditat Hindu dhe Budiste. Ky lloj meditimi përdor një tingull të përsëritur për ‘të pastruar’ mendjen. Mund të jetë një fjalë, frazë ose tingull, siç është “Om” i njohur.

Nuk ka rëndësi nëse mantra juaj flitet me zë të lartë ose në heshtje. Pasi të këndoni mantra për disa kohë, do të jeni më vigjilent dhe të përshtateni më mirë me mjedisin tuaj. Kjo ju lejon të përjetoni nivele më të thella të ndërgjegjësimit.

Disa njerëz kënaqen me meditimin e mantrës sepse e kanë më të lehtë të përqendrohen në një fjalë sesa në frymëmarrje. Kjo është gjithashtu një praktikë e mirë për njerëzit që nuk e pëlqejnë heshtjen.

6. Meditimi progresiv

I njohur gjithashtu si meditim i skanimit të trupit, është një praktikë që synon uljen e tensionit në trup dhe promovimin e relaksimit.

Shpesh, kjo formë e meditimit përfshin shtrëngimin dhe relaksimin ngadalë të një grupi muskujsh në të njëjtën kohë në të gjithë trupin.

Kjo formë e meditimit shpesh përdoret për të lehtësuar stresin dhe për t’u çlodhur para gjumit, shkruan Class.

7. Meditim me dashamirësi

Meditimi me dashamirësi përdoret për të forcuar ndjenjat e dhembshurisë, mirësisë dhe pranimit ndaj vetes dhe të tjerëve.

Zakonisht përfshin hapjen e mendjes për të marrë dashuri nga të tjerët dhe më pas dërgimin e një sërë urimesh për të dashurit, miqtë, të njohurit dhe të gjitha qeniet e gjalla.

Meqenëse ky lloj meditimi ka për qëllim të nxisë dhembshurinë dhe mirësinë, ai mund të jetë ideal për ata që mbajnë ndjenja zemërimi ose inati.

8. Meditimi i vizualizimit

Meditimi i vizualizimit është një teknikë e përqendruar në rritjen e ndjenjave të relaksimit, paqes dhe qetësisë duke vizualizuar skena ose imazhe pozitive.

Me këtë praktikë, është e rëndësishme të imagjinoni skenën si të vërtetë dhe të përdorni të pesë shqisat për të shtuar sa më shumë detaje të jetë e mundur.

Një formë tjetër e meditimit të vizualizimit përfshin imagjinimin e vetes tuaj duke arritur qëllime specifike, të cilat synojnë të rrisin fokusin dhe motivimin.

Shumë njerëz përdorin meditimin e vizualizimit për të rritur humorin e tyre, për të zvogëluar nivelet e stresit dhe për të promovuar paqen e brendshme. /Telegrafi/