Bislimi falënderon Kroacinë për donacionin prej 10 mijë dozash të vaksinës anti-Covid

Zëvendëskryeministri Besnik Bislimi, priti në takim ministrin e Punëve të Jashtme të Republikës së Kroacisë, Gordan Grliq Radman, me të cilin pati një diskutim të hapur rreth vazhdimit të marrëdhënieve shumë të mira me shtetin kroat dhe bashkëpunimin më të ngushtë me përfaqësimin e tyre në Kosovë.

Radman e uroi zëvendëskryeministrin Bislimi për marrjen e detyrës dhe e informoi atë rreth donacionit prej 10 mijë dozash të vaksinës anti-covid, që qeveria kroate ka ndarë për Kosovën në shenjë miqësie.

Ai shprehu gatishmërinë e Kroacisë në vazhdimin e përkrahjes së saj për Kosovën në sfera të ndryshme, ndër të cilat u veçua integrimi evropian, duke pasur parasysh procesin dhe periudhën e anëtarësimit të Kroacisë në BE.

Zëvendëskryeministri Bislimi falënderoi ministrin Radman dhe Kroacinë për mbështetjen e deritanishme për Kosovën dhe shprehu vullnetin e Qeverisë së Kosovës për forcimin e mëtejmë të marrëdhënieve ndërmjet dy vendeve.

Po ashtu falënderoi qeverinë kroate për donacionin prej 10 mijë vaksinash, duke theksuar se çdo sasi vaksinash e sjellë në këtë periudhë, ka vlerë shumë të madhe për ne.

Ministri i jashtëm kroat, Radman i bëri zëvendëskryeministrit të parë të Kosovës ftesë për një vizitë zyrtare në Kroaci, e që u mirëprit nga Bislimi.