Kurti: Prioritet në dialogun me Serbinë do ta kemi çështjen e krimeve të luftës dhe të pagjeturit

Kryeministri i vendit, Albin Kurti së bashku me kandidaten për presidente, Vjosa Osmanin, kanë bërë homazhe te Kompleksi Memorial në Krushë të Madhe, në 22-vjetorin e masakrës. 

Kurti ka pohuar se në bisedimet me Serbinë çështje me prioritet do të jenë krimet serbe në Kosovë dhe të pagjeturit, duke thënë se do kërkojnë drejtësi dhe përgjegjësi.

“Masakrat në Kosovë janë e vërteta e shtetit të Serbisë dhe janë e kaluara jonë e cila nuk kalon. Ajo është në të tashmen tonë, është përditë me neve, çdo mëngjes kur zgjohemi e çdo mbrëmje kur nuk na zë gjumi. 547 viktima civile janë në komunën e Suharekës, një ndër komunat më të goditura dhe 80 janë ende të pagjetur”, u shpreh tutje ai, duke thënë se Serbia pas vrasjeve që kreu këtu me forcat e saj i rrëmbeu edhe kufomat dhe u përpoq që ta varros të vërtetën por që ajo rishfaqej nëpër liqenet e saj nga kamionët të cilët nuk ngeleshin dot në thellësi të ujërave atje.

Osmani ka thënë se Krusha e Madhe dhe masakrat e kryera janë “zëri i lartë i ndërgjegjes që thërret për drejtësi”.

Osmani dhe Kurti më pas do të bëjnë homazhe edhe në Krushë të Vogël, në nderim të të 22-vjetorit të masakrave të ndodhura në këto dy fshatra.