Demaliaj: Nëse del që jam përfshirë në një rast të vetëm të manipulimit të votave, i kthej të gjitha mjetet që i kam marrë nga buxheti i Kosovës

Ish-kandidati për deputet nga AAK, Shkumbin Demaliaj ka bërë një premtim publik nëse vërtetohet diçka se ai ndonjëherë është përfshirë në ndonjë blerje votash.

“Për të ruajtur nderin tim do t’i shkojë deri në fund kësaj çështje [përmendja e emrit të tij në një incizim ku flitet për blerje të votave]. E them haptas që nëse Shkumbin Demaliaj jo vetëm në këtë proces, por në të gjitha proceset zgjedhore kur ka marrë pjesë del se është i përfshirë në një rast të vetëm të manipulimit të votave apo ndonjë afere tjetër kriminale, të gjitha mjetet që i ka marrë nga buxheti i Kosovës do t’ia kthejë shtetit”, tha Demaliaj në “Debat Plus”.

“Betohem në emër të familjes dhe si anëtarë i AAK-së që asnjëherë nuk jam i përfshirë në ndonjë manipulim të votave”, tha ai, përcjell Telegrafi.

Demaliaj thotë se vullnetarisht do të paraqitet te prokurori pasi i është perënduar emri.

Ish-deputeti i AAK-së thotë se deri më tani ajo që dihet është se personalisht Meliza Haradinaj-Stublla nuk është e përfolur për përfshirje në manipulime të votave.

Demaliaj thotë se ka gatishmëri nga të gjitha subjektet politike për të shkuar drejt procesit të rinumërimit të votave./Telegrafi/