Vdes miku i madh i Kosovës, poeti Jevrem Bërkoviq

Në moshën 88-vjeçare, mbrëmë ka vdekur një prej poetëve më të mëdhenj të Malit të Zi të shekullit XX, Jevrem Bërkoviq.

Brkoviq lindi në fshatin Piper më 23 dhjetor 1933, ku ka mbaruar shkollën fillore. Gjimnazin e kreu në Titograd (Podgorica e sotme) dhe në Sarajevë ku e përfundoi edhe Shkollën e Lartë të Gazetarisë. Poezitë e para i ka botuar në gazetën “Pobjeda”, “Zora” dhe “Nin”. Është fitues i një serie çmimesh në hapësirat e ish-Jugosllavisë. Ndërsa, është nderuar disa herë edhe në Kosovë: më 2005 me çmimin “Kepi i shpresës së mirë”, më 2013 me çmimin “Teuta”, e më 2015 me çmimin “Ali Podrimja”.

Bërkoviq, ishte një nga malazezët e rrallë që pranonte se ka origjinë shqiptare. Ai madje ka nxitur reagime të mëdha në Serbi kur ka thënë se Millosh Obiliqi dhe Karagjorgjët janë shqiptarë.

“Milloshi ishte shqiptar në shërbimin e mbretit serb Lazarit. Babai i Karagjorgjit ishte shqiptar nga veriu i Shqipërisë, e nëna nga fisi i Vasojeviqëve që ishin po ashtu shqiptarë”, ka thënë shkrimtari dhe akademiku i cili më 1991, për shkak të qëndrimeve politike që binin ndesh me ato të Sllobodan Millosheviqit, emigron në Kroaci ku jeton deri më 1999.

Bërkoviqi po ashtu ka vlerësuar letërsinë shqiptare të Kosovës.

“Jam takuar me poezinë e Migjenit dhe të  Vëllezërve Frashëri. Isha i befasuar me origjinalitetin dhe perfeksionizmin. Më duhet të them se me vite, apo më mirë të them me dekada, qëkur ka ekzistuar Jugosllavia, jam miqësuar me poetët kosovarë – Ali Podrimjen, Azem Shkrelin, Enver Gjerqekun, Din Mehmetin, Ibrahim Kadriun, Ramiz Kelmendin, Beqir Musliun, Ismet Markoviqin, Qerim Ujkanin, Rugovën, Rexhep Qosjen… Në rininë e hershme jam njohur me Esad Mekulin, klasikun e letërsisë shqipe në Kosovë. Shpejt u bëmë miq, dhe jo vetëm sa për sy e faqe, por miqësi e ngushtë, ashtu siç malazezët e shqiptarët dinë të miqësohen”, ka thënë ai. /Telegrafi/