Vijon vaksinimi kundër COVID-19 në Shqipëri

Kryeministri i Shqipërisë, Edi Rama ishte sot në stadiumin “Air Albania” ku vaksinimi në ditën e dytë po vijon me epidemiologë nga Tirana, Durrësi, Kruja e Kavaja, për të garantuar asgjësimin e rrezikut nga armiku i padukshëm të skuadrës së atyre që bëjnë testimet nëpër shtëpitë e qytetarëve me simptoma të COVID-19.

I shoqëruar nga ministrja e Shëndetësisë dhe Mbrojtjes Sociale, Ogerta Manastirliu, Rama u interesua për procesin e vaksinimit, ndërsa falënderoi mjekët për kontributin e tyre në këtë luftë.

“Faleminderit për punën se keni bërë punë të jashtëzakonshme dhe keni qenë me risk gjithë kohës”, tha Rama.

Ministrja Manastirliu u shpreh se, “dita e djeshme vajti mirë, kemi vaksinuar 50 mjekë e infermierë”.

“Kemi sot pjesën tjetër të mjekëve e infermierëve të dy spitaleve COVID, ‘Shefqet Ndroqi’ dhe ‘Infektivi’ më pas vazhdojmë me spitalet COVID 3 dhe 4, por paralelisht sot kemi filluar vaksinimin edhe të epidemiologëve. E kemi nisur me epidemiologët e Tiranës, Durrësit, Kavajës dhe Krujës dhe më pas do shpërndahemi në gjithë Shqipërinë”, tha ministrja.

Lexo po ashtu Edi Rama merr vaksinën kundër COVID-19

Ajo theksoi se pranë Air Albania Stadium është krijuar praktika e regjistrimit me formularët që marrin të gjithë ata që vijnë.

“Nuk kemi pasur asnjë informacion në lidhje me ndonjë formë reaksioni ditën e djeshme”, tha ajo.

Manastirliu tha se do të kryhet vaksinim i kombinuar sipas strategjisë që kanë përcaktuar ekspertët.

Ndërsa Silva Bino theksoi se, “vaksina vjen nga frigoriferi i ISHP ku ruhet në temp -80 gradë celsius dhe sillen këtu, vetëm dozat që janë planifikuar të aplikohen. Dje nuk kemi asnjë dozë të humbur. Qëllimi ynë është të mos kemi asnjë dozë të humbur. Çdo flakon duhet të përdoret brenda dy orësh. Jemi përpjekur të bëjmë organizimin të mos humbë asnjë dozë dhe kushtet e ruajtjes të jenë të sakta, sipas rekomandimit të prodhuesit”, tha ajo, ndërsa shtoi se, “në ambientet e Air Albania ka një frigorifer, ndërkohë që në terren do të përdoren kutitë e posaçme të ISHP-së”.

Bino tha se, “ne mund të vaksinojmë 600 veta brenda ditës”. “Kemi për të vaksinuar edhe të moshuarit në shtëpitë e të moshuarve. Do të fillojnë menjëherë krahas punonjësve shëndetësor”. /ATSH/