Evropa jo në një ‘situatë të qëndrueshme’ sa i përket përballjes me coronavirusin – thotë OBSH

Epidemia COVID-19 mbetet “e brishtë” në të gjithë rajonin evropian, tha të enjten Organizata Botërore e Shëndetësisë, ndërsa rastet rriten në Evropën Qendrore, Ballkan dhe Kaukaz.

“Ne nuk mund të themi se jemi në një situatë të qëndrueshme në të gjithë rajonin për momentin”, ka thënë Dr. Catherine Smallwood nga Programi i Emergjencave Shëndetësore të OBSH-së në një konferencë për shtyp, përcjell Telegrafi.

Rajoni evropian i OBSH-së, përbën 40% të rasteve globale, tha Dr. Hans Kluge, drejtori rajonal i OBSH-së për Evropën, duke paralajmëruar se rastet në rritje në Evropën Qendrore dhe Jugore ishin “shqetësuese”.

Sipas të dhënave, shkruan Euronews, Gjeorgjia, Serbia, Luksemburgu dhe Kroacia kanë numrin më të lartë kumulativ të rajonit të rasteve me COVID-19 për 100,000 banorë, në dy javët e fundit.

Në këtë drejtim, Dr. Kluge theksoi se duhej të kishte kufizime në tubimet e mëdha, duke përmendur edhe “tubimet fetare si funeralet masive”.

Ndryshe, sipas Euronews, vendet e Evropës Perëndimore po shohin përmirësime me shtrimet në spital në vendet që sollën masa të ashpra për të luftuar virusin, me disa që planifikonin të dilnin nga bllokimet përpara sezonit të festave.

Por ekspertët në OBSH paralajmëruan se COVID “nuk është zhdukur” dhe “nuk do të zhduket”.

“Gjatë periudhave të pushimeve të Krishtlindjeve dhe dimrit ka një potencial, një potencial shumë real që ai të bëhet edhe më shumë një problem ndërsa njerëzit përpiqen të mblidhen”, ka paralajmëruar Dr Smallwood në konferencë. /Telegrafi/