Lajme Kosovë

Haradinaj: BE duhet t’i shtrinte dorën Kosovës – liberalizimi i vizave duhet dhënë menjëherë

Para 4 vitesh

Kreu i Aleancës së Ardhmërisë së Kosovës (AAK), Ramush Haradinaj tha se në kohën kur lufta e UÇK-së, vihet në dyshim, kur lidershipi i Kosovës po përballet me akuza në Hagë e kur ka plot probleme të brendshme, përfshirë këtu edhe pandeminë, Bashkimi Europian nuk duhet të qëndronte indiferent, por duhet t’i shtrinte dorën Kosovës me disa veprime konkrete.

“Liberalizimi i vizave, njohja e plotë dhe statusi i kandidatit, është një fazë shumë e hershme e nisjes së rrugëtimit drejt BE”, u shpreh Haradinaj.

Ai tha se pas zhvillimeve të fundit që kanë ndodhur me ish-krerët e UÇK-së do ta vuajnë edhe institucionet e Kosovës.

“Shprehja e mosbesimit që ti ta bësh një gjykatë në vendin tënd tregon për nivel të dobët të shtetit ligjor, tregon për një pamundësi që për të gjykuar veprën e tillë. Pastaj lajmet se po gjykohen udhëheqësit e Kosovës, udhëheqësit e UÇK-së bëjnë dëm të madh në besim te palët e ndryshme, edhe ata politik e institucional, por edhe te ekonomia investitorët te shoqëria civile, opinioni, te media”, tha ai.

Tutje, Haradinaj theksoi se Kosovës pos se i vështirësohet pozita e vet edhe në planin e brendshëm, do t’i vështirësohet edhe në rajon e më gjerë.

Më pas, Haradinaj tha se liria s’ka çmim, se për liri edhe jeta jepet edhe çdo gjë tjetër.

“ Ne kemi dhënë jetë, kemi luftue edhe me rrezikun e jetës. Mirëpo kjo është një barrë që po i ngarkohet Kosovës tani, e Kosova për ta mbajt këtë barrë e vetme e ka të vështirë. E ka të vështirë për faktin që jemi edhe vend i ri. Kemi situatë të rëndë ekonomike për shkak të pandemisë, kemi çështje të pazgjidhura në rajon, sikurse dialogu me Serbinë e në këtë kohë besoj se BE duhet t’ja shtrinte dorën Kosovës me disa veprime konkrete, që përpos ndihmës që na jep me gjykatën, këtë ndihmë na e jep edhe Amerika edhe BE, se ata thonë se ne po ju ndihmojmë ju me vendos të drejtën me shqyrtu këto çështje të së kaluarës. Ok, ju po na jepni këtë ndihmë, po a mundeni me na dhënë edhe një ndihmë tjetër, që si Kosovë ne të përballojmë këtë gjendje pa pasojë të brendshme”, tha Haradinaj në News24.

Ai tregoi edhe disa veprime që BE-ja mund t’i bëjë për Kosovën

“Cilat mund të ishin veprimet e BE-së të cilat mund t’i kishte dhënë menjëherë, psh: liberalizimi i vizave, për qytetarët e Kosovës. Jemi të vetmit në kontinent që nuk e kemi të drejtën e lëvizjes së lirë, jemi të izoluar. Njohjen nga pesëshja e BE-së që nuk e kanë njohur Kosovën. Ju e shihni kishte mjaft kritika për administratën e Presidentit Trump, për marrëveshjen e 4 shtatorit, por ajo solli njohjen e Izraelit e mendojmë që BE duhet të na ndihmojë për të na njohur pesëshja e vendeve që nuk e kanë njohur Kosovën, sepse në këtë mënyrë ia lehtëson Serbisë marrëveshjen me Kosovën. Kur na njeh Greqia, Qipro, Rumania, Sllovakia e Spanja është më lehtë për Serbinë me njohtë Kosovën. Argumentet i ka më të lehta për qytetarët e vet për me njohtë Kosovën, e kështu i jepet Kosovës kandidatura”, tregoi kreu i AAK-së.

Haradina gjithashtu tha se liberalizimi i vizave, njohja e plotë dhe statusi i kandidatit është një fazë shumë e hershme e nisjes së rrugëtimit drejt BE.

“BE mendoj që duhet të na japë këto tri të drejta, por që do ndihmonin edhe menaxhimin e gjendjes së brendshme në të cilën ndodhemi tani si vend”, shtoi ai.