Osmani: Hoti më ka konfirmuar se nuk ka planifikuar takime rreth dialogut

Kryetarja e Kuvendit të Kosovës, Vjosa Osmani e cila po ushtron edhe detyrën e Presidentes së vendit, ka thënë se nuk është planifikuar ndonjë takim me palën serbe sa i përket dialogut dhe se konsideron se kjo nuk është kohë e favorshme që të vazhdohen këto takime.

Osmani gjatë konferencës për medie tha se vet kryeministri i vendit, Avdullah Hoti gjatë takimit që kishte me të i kishte konfirmuar se nuk ka planifikuar ndonjë takim me palën serbe.

“Nuk e kam fjalën për një shtyrje, por nëse vendoset që të vazhdohet tash këto ditë, nuk më duhet se Kosova do të jetë në kushte të favorshme për të vazhduar tani me këto takime. E kam diskutuar edhe dhe i kam thënë se nuk mendoj se është e favorshme kjo kohë për të vazhduar dialogu, ndërsa ai më konfirmoi se nuk ka të planifikuar ndonjë takim gjatë ditëve të ardhshme”, tha Osmani.

Sa i përket pjesëmarrjes së saj në këtë proces, ajo tha se nuk është ftuar që të marrë në procesin e dialogut.

Osmani u shpreh se nuk është e domosdoshme prezenca e të gjithëve në dialog, por duhet të jenë të gjitha forcat politike të bashkuara në një qëndrim që do të përfaqësohej në këtë dialog nga përfaqësuesi legjitim.

“As si ushtruese e detyrës së Presidentit, por as si kryetare e Parlamentit të përfshihem në procesin e dialogut. Nuk besoj që do të ishte racionale, që të futem në një proces në të cilin nuk kam marrë pjesë nga fillimi, apo të marrë përsipër marrëveshje që i kanë negociuar të tjerët, është tjetër gjë kur ulem nga fillimi dhe marr përsipër negociatat, por të marrë përsipër marrëveshje të cilat i kanë negociuar të tjerët nuk mendoj se është racionale dhe nuk i ndihmon situatën. Do të bëjë të pamundurën ta ndihmoj shtetin tim. Nuk është që kam pasur kërkesë nga dikush në Kosovë që të jap kontributin tim. Përtej rolit tim personal mendoj se të gjitha forcat politike të jenë të bashkuara. Është mirë që Kosova të jetë sa më mirë e përfaqësuar, kjo nuk do të thotë që duhet prezenca e secilit në Bruksel, por nënkupton se në Kosovë duhet ta ndërtojmë një qëndrim dhe që ai qëndrim të përfaqësohet nga përfaqësues legjitim të Kosovës”, tha Osmani gjatë konferencës për medie. /Telegrafi/