Hulumtuesit nga Harvardi porositin: Rreziku që të infektoheni me COVID-19 në aeroplan është shumë i ulët, bartni maska

Rreziku që të infektoheni me COVID-19 nëpër aeroplanë, gjithmonë duke respektuar masat e sigurisë, është shumë i ulët, më mirë thënë dukshëm më i ulët sesa në dyqan apo restorant, thuhet në një studim të realizuar nga një grup hulumtuesish nga Harvardi.

Hulumtimi është financuar nga “Airlines for America” që mbledh aviokompanitë dhe prodhuesit e avio-pajisjeve, në kohën kur kompanitë amerikane brenda një muaji regjistrojnë miliarda dollarë humbje për shkak të rënies së udhëtimeve për shkak të coronavirusit, transmeton Telegrafi.

Aviokompanitë amerikane kanë realizuar për 50 për qind më pak fluturime, krahasuar me të njëjtën periudhë kohore të vitit të kaluar.

Hulumtimi ka treguar se pasi që aviokompanitë e kanë bërë të obligueshme bartjen e masave, kanë rritur nivelin e pastërtisë dhe ndërruar mënyrën e hyrjes dhe daljes nga aeroplani për pasagjerët, “ekzistojnë pak dëshmi për infektim gjatë udhëtimit me aeroplan”.

Gjithashtu thuhet se brenda aeroplanëve ka sistem të ventilimit që ndërron ajrin mesatarisht çdo pesë minuta, ku 99 për qind të spërkalave të coronavirusit përfundojnë jashtë.

Shkencëtarët pretendojnë se maskat ulin dukshëm rrezikun e përhapjes së coronavirusit, e Qendra amerikane për Kontroll dhe Parandalimin e Sëmundjeve, rekomandon që pasagjerët dhe anëtarët e ekuipazhit në aeroplanë dhe aeroporte të bartin maska për të parandaluar përhapjen e COVID-19. /Telegrafi/