MASHT dhe SBASHK-u konfirmojnë se shkollat hapen me 14 shtator

Deri më 14 shtator, do të përfundojnë përgatitjet e nevojshme, në mënyrë që viti I ri shkollor të nis pa vonesa të reja, zotohet Ministria e Arsimit. 

Mësimi, sipas planeve të prezantuara, do të bëhet me faza të caktuara për të gjitha nivelet e arsimit para universitar.

Përgjithësisht shkollat janë gati për fillimin e vitit të ri shkollor. Kështu tha Ministria e Arsimit ndërmjet një përgjigje me shkrim.

Po ashtu, nga kjo ministri u tha se mësimi do të fillojë në të gjitha nivelet e arsimit para universitarë.

“Është vlerësuar se përgjithësisht shkollat janë të përgatitura përjashtimisht disa shkollave që kanë pasur nevoja plotësuese për fillimin e mësimit, të cilat janë evidentuar dhe punuar me to në përmirësim të kushteve. Vendimi për fillimin e vitit të ri shkollor do të bëhet në faza për të gjitha nivelet e arsimit para universitar, në bashkëpunim të plotë me MSH dhe IKSHPK-në, DKA-të, Këshillin e prindërve dhe sindikatat, në bazë të vlerësimit të situatës epidemiologjike në Kosovë”, thuhet në përgjigjen e MASHT për RTV Dukagjinin.

Se shkollat dhe mësimdhënësit janë gati për procesin e ri mësimor e tha edhe Kryetari i Sindikatës së Bashkuar të Arsimit, Shkencës dhe Kulturës, Rrahman Jashari.

“Ne si SBASHK themi se mësimdhënësit janë të gatshëm për fillimin e vitit shkollor duke marrë informacione se janë bërë përgatitje edhe për ata edhe për fëmijët se do të mbrohen nga virusi COVID-19”, ka deklaruar për RTV Dukagjinin, Rrahman Jasharaj, përcjell Telegrafi.

Por, njohësi i arsimit, Rinor Qehaja tha se shtyrja e procesit të mësimit për dy javë, nuk e ka ndihmuar shumë përgatitjen e shkollave për fillimin e vitit të ri shkollor

“Unë besoj se shtyrja e procesit për dy javë nuk është që ka kontribuar në përgatitjen e komunitetit të shkollës. Mund të jenë përmirësuar disa detaje por jo që shkollat tona të jenë më të sigurta. Gjithçka varet nga vetëdijesimi i komunitetit të shkollës”, deklaroi Rinor Qehaja nga instituti Ed Guard.

Ministria e Arsimit po ashtu tha për RTV Dukagjinin se sa i përket testimit të mësimdhënësve nëse mund të jenë të prekur nga Covid-19, janë bërë të gjitha përgatitjet, dhe që janë  në pritje të konfirmimit të listave të mësimdhënësve që do të testohen nga DKA-të për të proceduar më tutje për testim./RTV Dukagjini/Telegrafi/