Selimi: Momentumi i stabilitetit politik në Kosovë varet nga AAK-ja

Ministri i Drejtësisë dhe zyrtari i AAK-së, Selim Selimi ka treguar arsyet pse AAK e sheh të përshtatshëm Ramush Haradinajn për postin e presidentit.

Selimi në “Debat Plus” me Ermal Pandurin në RTV Dukagjini ka thënë se mbledhja e sotme e AAK-së tregoi se kjo e fundit është parti transparente në raport me popullin e Kosovës.

Ai ka thënë se AAK e ka parë që Ramush Haradinaj është i denjë për postin e presidentit për të krijuar unitetin e brendshëm politik.

“Më shumë se marrje e një privilegji politik, posti i presidentit është përgjegjësi për Haradinajn”, tha Ministri i Drejtësisë, përcjell Telegrafi.

Selimi thotë se AAK ka krijuar një stabilitet politikë në Kosovë dhe me propozimin e Haradinajt për president ky “momentum i stabilitetit politik” do të ruhej.

“Momentumi i stabilitetit politik në Kosovë varet nga AAK-ja. Ne u futëm në qeveri me LDK-në pa kërkuar asgjë dhe pa asnjë kusht vetëm për të ruajtur stabilitetin politik”.

Ministri i Drejtësisë thotë se e kaluara e Haradinajt deri më tani ka treguar se ai i sheh më me rëndësi çështjet kombëtare se përfitimet politike.

“Aleanca do të jetë në çfarëdo kombinimi për të ruajtur stabilitetin politik në Kosovë”, tha ndër të tjera Selim Selimi./Telegrafi/