Edita Tahiri: Nga zyra e qeverisë nuk mbrohen kufijtë

Ish-kryenegociatorja e Kosovës në dialogun me Serbinë, Edita Tahiri, ka reaguar pas hyrjes së xhandarmërisë serbe në Karaçevë të Kamenicës.

Ajo në një postim në Facebook ka shkruar se reagimi i institucioneve të Kosovës ndaj këtij rasti ishte i zbehtë.

“Përpjekjet sekrete për të prekur kufijtë e Kosovës dështuan. Këto ditë Serbia shkeli haptazi kufirin në Karaçevë. Reagimi i institucioneve ishte i zbehtë, mbeti vetëm në fjale. Nga zyra e qeverisë nuk mbrohen kufijtë”, ka thënë Tahiri.

Lexo po ashtu Shqetësohen banorët e Karaçevës, xhandarmeria serbe filmohet nga kamerat e sigurisë duke kaluar në parkingun e një restoranti

Ndryshe, të premten nëpër rrjetet sociale qarkulluan video dhe fotografi ku shiheshin ushtarë serbë në Karaçevë të Kamenicës. Kjo gjë ngjalli reagime të shumta sidomos te banorët e asaj zone, të cilët thanë se po ndjehen të rrezikuar.

E kryeministri Avdullah Hoti gjatë një bisede me komandantin e KFOR-it, gjeneralin Risi është njoftuar se një veprim i tillë ka qenë një̈ patrullim i përbashkët i KFOR-it dhe Forcave të Armatosura të Serbisë, me të cilat që nga 2008 KFOR-i zhvillon patrullime të përbashkëta përgjatë vijës kufitare.

Hoti ka thënë se kufijtë e Kosovës janë të sigurt dhe të njohur ndërkombëtarisht dhe se në ditët në vijim do të merren veprime konkrete, në koordinim me mekanizmat ndërkombëtarë të sigurisë, përfshirë patrullimet e përbashkëta me KFOR-in.