Fauci: Mësuesit bëhen ‘pjesë e eksperimentit’, kur shkollat të rihapen në mes të pandemisë COVID-19

Dr. Anthony Fauci, anëtar i task-forcës së Shtëpisë së Bardhë për coronavirus dhe ekspert i lartë i sëmundjeve infektive, ka thënë se mësuesit janë pjesë e “eksperimentit” mbi atë që ndodh kur shkollat rihapen në mes të pandemisë COVID-19.

Sipas Newsweek, përcjell Telegrafi, vërejtjet e tij janë më të fundit në debatin e vazhdueshëm rreth kthimit të fëmijëve në klasa.

Siç bëhet e ditur, Fauci bëri komentet e tij në një intervistë virtuale të martën me Randi Weingarten, presidentin e Federatës Amerikane të Mësuesve.

Weingarten pyeti Fauci se cilat janë kushtet thelbësore për t’i mbajtur fëmijët dhe të rriturit të sigurt kur kthehen në mësimin personal brenda vitit të ardhshëm.

Drejtori i Institutit Kombëtar të Alergjisë dhe Sëmundjeve Infektive tha se nuk ka një përgjigje njëdimensionale për atë pyetje, pasi situatat ndryshojnë në të gjithë vendin.

Fauci tha se “situata e paracaktuar” duhet të jetë që fëmijët të kthehen në shkollë, si për mirëqenien e tyre, ashtu edhe për të mbrojtur prindërit që punojnë.

“Por në këtë ka edhe një ‘megjithatë’”, ka thënë Fauci, duke deklaruar se siguria, shëndeti dhe mirëqenia e fëmijëve, mësuesve dhe personelit është “thelbësore”.

Nuk ka asnjë formë që i përshtatet të gjitha zgjidhjeve, tha ai.

Fauci tha se përgjigjet për shumë pyetje në lidhje me rihapjen e shkollave mbeten të panjohura.

“Në shumë aspekte, për fat të keq, megjithëse kjo mund të duket pak e frikshme dhe e ashpër… është që ti do të jesh në të vërtetë pjesë e eksperimentit”.

Vërejtjet e tij vijnë mes një debati nëse fëmijët duhet të kthehen në shkolla në vjeshtë.

Ndërsa rastet e COVID-19 rriten në të gjithë vendin, presidenti Donald Trump ka shtyrë që ata të kthehen në shkolla.

Madje presidenti ka kërcënuar të ndalë ndihmën federale për institucionet që refuzojnë të zhvillojnë orë mësimore. /Telegrafi/