​LDK lidh koalicion me AKR dhe PD në Mitrovicë

Lidhja Demokratike e Kosovës, Dega në Mitrovicë, ka nënshkruar sot marrëveshjen e koalicionit me Aleancën Kosova e Re dhe Partinë e Drejtësisë, për paraqitje të përbashkët rreth aktiviteteve dhe qëndrimeve të tyre në të mirë të qytetarëve, përfshirë zgjedhjet lokale vitin e ardhshëm.

Marrëveshja është nënshkruar nga liderët e këtyre partive në Mitrovicë.

Kryetari i Degës së LDK-së në Mitrovicë, Safet Kamberi, tha se qëllimi i kësaj marrëveshje është bashkëpunimi dhe koordinimi i aktiviteteve në lidhje me politikat lokale në këtë komunë.

Sipas tij, qëndrimet mes këtyre tre partive tashmë do të jenë të koordinuara për t’i ngritur të gjitha shqetësimet që janë me interes qytetar.

“Qëllimi i kësaj marrëveshje është bashkëpunimi dhe koordinimi i të gjitha aktiviteteve të cilat kanë të bëjnë me politikat lokale në komunën e Mitrovicës, u një prej pikave të bashkëpunimit në mes të LDK-së, AKR-së dhe PD-së do të jenë pa dyshim edhe zgjedhjet lokale që do të mbahen në vitin 2021. Gjithsesi qëndrimet tona tashmë do të jenë të koordinuara mes këtyre tre subjekteve dhe ne do t’i ngremë të gjitha shqetësimet të cilat janë me interes qytetar”, ka thënë Kamberi.

Edhe Nysret Qubreli, u.d. i kryetarit të Degës së AKR-së në këtë qytet, tha se puna e këtyre tre subjekteve politike do të përqendrohet në të mirën e qytetarëve.

Qubreli: Do të bashkëpunojmë për të mirën e qytetarëve të Mitrovicës

“Duke parë situatën në komunën e Mitrovicës që është e pa lakmueshme dhe nuk është e mirë, kemi vendosur të punojmë në të gjitha pikat të cilat do të jenë në Komitetin për politikë dhe financa, përkatësisht në asamble, të bashkëpunojmë ne si tre subjekte politike, si më të fuqishmet tani në kuvend që të arrimë që të bashkëpunojmë për të mirën e qytetarëve”, tha Qubreli.

Ndërkaq, Vesel Neziri kryetar i Degës së Partisë së Drejtësisë në Mitrovicë, u shpreh i bindur se ky bashkëpunim mes këtyre subjekteve do të jetë i sinqertë, në të mirë të Mitrovicës dhe qytetarëve të saj.

“Ka ardhur momenti që ne si tre subjekte të ngremë zërin fuqishëm dhe të ecim tutje. Ky bashkëpunim besoj se do të jetë i sinqertë, në të mirë të Mitrovicës dhe qytetarëve të saj, duke e lutur Zotin e madhëruar që të na ndihmojë në këtë rrugë, në mënyrë që të ecim përpara dhe të kemi suksese”, tha Neziri. /kp/