Rastet e reja në Kinë tregojnë se virusi mund të ndryshojë

Mjekët kinezë po shohin se coronavirusi po manifestohet ndryshe midis pacientëve në grupin e ri të rasteve në rajonin verilindor në krahasim me shpërthimin origjinal në Wuhan, duke sugjeruar që patogjeni mund të ndryshojë në mënyra të panjohura dhe të ndërlikojë përpjekjet për ta ndaluar atë.

Siç shkruan Bloomberg, përcjell Telegrafi, pacientët e gjetur në provincat veriore të Jilin dhe Heilongjiang duket se mbartin virusin për një periudhë më të gjatë dhe kërkojnë më shumë kohë për të dalë negativ në testim, tha Qiu Haibo, një nga mjekët kryesorë të Kinës për kujdesin kritik, për televizionin shtetëror.

Pacientët në verilindje gjithashtu duket se po marrin më shumë se një deri në dy javë, siç ishin në Wuhan, për të zhvilluar simptoma pas infeksionit, dhe kjo shfaqje e vonuar po e bën më të vështirë për autoritetet të kapin raste para se të përhapen, tha Qiu, i cili tani është në rajonin verior ku po trajtohen pacientët.

“Periudha më e gjatë, gjatë së cilës pacientët e infektuar nuk tregojnë simptoma ka krijuar grupe të infeksioneve familjare”, tha Qiu, i cili u dërgua më herët në Wuhan për të ndihmuar në shpërthimin fillestar.

Rreth 46 raste janë raportuar gjatë dy javëve të kaluara të përhapura në tre qytete – Shulan, qytetin Jilin dhe Shengyang – në dy provinca, një ringjallje e infeksionit që shkaktoi masa të reja të bllokimit mbi një rajon me 100 milionë njerëz.

Dhe shkencëtarët ende nuk e kuptojnë plotësisht nëse virusi po ndryshon në mënyra domethënëse dhe ndryshimet që mjekët kinezë po shohin mund të jenë për shkak të faktit se ata janë në gjendje të vëzhgojnë pacientët në mënyrë më të plotë dhe nga një fazë më e hershme sesa në Wuhan.

Kur shpërthimi i parë ndodhi në qytetin qendror kinez, sistemi lokal i kujdesit shëndetësor ishte aq i mbingarkuar sa që vetëm rastet më të rënda po trajtoheshin.

Numri në verilindje është gjithashtu shumë më i vogël se shpërthimi i Hubei, i cili përfundimisht preku mbi 68,000 njerëz.

Megjithatë, gjetjet sugjerojnë që pasiguria e mbetur në lidhje me mënyrën se si manifestohet virusi do të pengojë përpjekjet e qeverive për të frenuar përhapjen e tij dhe për të rihapur ekonomitë e tyre të shkatërruara.

Kina ka një nga regjimet më gjithëpërfshirëse të zbulimit dhe testimit të viruseve në nivel global dhe ende po përpiqet të përmbajë grupin e saj të ri.

Gjithashtu, siç shkruan Bloomberg, përcjell Telegrafi, studiuesit në të gjithë botën janë duke u përpjekur të konstatojnë nëse virusi po pëson mutacion në një mënyrë domethënëse për tu bërë më ngjitës pasi përcillet përmes popullatës njerëzore, por hulumtimet e hershme që sugjerojnë këtë mundësi janë kritikuar dhe hedhur poshtë.

“Në teori, disa ndryshime në strukturën gjenetike mund të çojnë në ndryshime në strukturën e virusit ose si sillet virusi”, tha Keiji Fukuda, drejtor dhe profesor klinik në Shkollën e Shëndetit Publik të Universitetit të Hong Kong-ut. “Megjithatë, shumë mutacione nuk çojnë në ndonjë ndryshim të dukshëm”.

Ndërkohë Qiu ka thënë se mjekët gjithashtu kanë vërejtur pacientë në grupin verilindor duket se kanë dëmtime kryesisht në mushkëri, ndërsa pacientët në Wuhan pësuan dëme shumë-organike në të gjithë zemrën, veshkat dhe zorrët.

Veç këtyre, zyrtarët tani besojnë se “forma e re” buronte nga kontakti me ardhjet e infektuara nga Rusia, e cila ka një nga shpërthimet më të këqija në Evropë.

Renditja gjenetike ka treguar një përputhje midis rasteve verilindore dhe atyre të lidhura me Rusinë, tha Qiu. /Telegrafi/