Sabri Fejzullahu i këndoi Prishtinës, zëri i tij jehoi nga stadiumi i zbrazët “Fadil Vokrri” për të gjithë qytetarët e vendit

Këngëtari i madh, Sabri Fejzullahu, natën e sotme (e shtunë) ka kënduar për një audiencë shumë më ndryshe.

Me një pamje nga Stadiumi i Prishtinës, “Fadil Vokrri”, i cili për herë të parë ishte i zbrazët para një shfaqje që po jepej, zëri i Fejzullahut kumboi në tërë kryeqytetin.

I shoqëruar nga vetëm një pianist, Sabriu interpretoi disa nga hitet më të mëdha të karrierës së tij, ndër to këngë dedikuar Prishtinës, të cilat nuk janë të pakta në repertoarin e tij.

Ideuar nga kryetari i Komunës së Prishtinës, Shpend Ahmeti, Fejzullahu sonte mbajti koncert jo vetëm për një numër të caktuar njerëzish, por për tërë Kosovën, duke qenë se e gjithë performanca e tij u transmetua direkt në platformat dixhitale.

Përveç solo-koncertit, Sabri Fejzullahu përmes fotografive të shfaqur në ekranin gjigant të stadiumit, kujtoi figurat e njohura të artit që i kemi humbur këtë vit si: Nexhmije Pagarusha, Leze Qena, Violeta Rexhepagiqi etj.

Teksa qytetarët e Kosovës përballen me sfidat e një pandemie globale, nata e së shtunës i gjeti më të relaksuar me kujtime nën interpretimin e shkëlqyer të këngëtarit të popullit, Sabri Fejzullahu. /Telegrafi/