Mustafa bisedon me zyrtarët e Parlamentit Evropian, i njofton ata për situatën politike

Kryetari i Lidhjes Demokratike të Kosovës, Isa Mustafa ka njoftuar se sot gjatë ditës ka pasur një video-konferencë me zyrtarë të lartë të Parlamentit Evropian dhe të Partisë Popullore Evropiane.

Mustafa ka thënë se kanë biseduar për situatën e krijuar nga coronavirusi si dhe për zhvillimet politike, transmeton Telegrafi.

“Sot kisha një video konferencë me zyrtarë të lartë të Parlamentit Evropian dhe të EPP-së, z. Andrey Kovatchev, z. David McAllister, z.Lukas Mandl dhe z.Patrick Voller. Së bashku me mua ishin z. Avdullah Hoti dhe z. Valon Halimi, i cili koordinon bashkëpunimin e LDK-së me EPP.  Biseduam për mënyrën se si po e përballojmë situatën me COVID-19, për zhvillimet politike në javët e fundit dhe zhvillimet që pritet të ndodhin”, ka shkruar ai në Facebook.

I pari i LDK-së, ka thënë se janë të bekuar që kanë miq në Bashkimin Evropian.

“Ndamë qëndrimin se LDK dhe EPP promovojnë vlera të përbashkëta dhe se LDK-ja mbetet partner i EPP-së në rrugën e Kosovës drejt BE-së.  Jemi të bekuar që kemi miq të tillë në BE, të cilët do të na qëndrojnë në krah edhe në të ardhmen për të lehtësuar integrimin evropian të Kosovës”./Telegrafi/

https://www.facebook.com/IsaMustafaKS/posts/2846482335417985